Suwa Tutông, Calitra Sosialisasi Bèk Teupèh Virus Corona (2)
Nasaja Berita - Budaya, Lheueh di deungoe pengumuman bak Meulasah mugréb baroe, si Farid ka keumah ngon ija krông, kupiah aji, bajèe kôkô. Keunira jak lom. Bak keudè ka hana jijak lé. Ka ipatéh Ma. Ma teungoh geu suleueng bu adoe ih nyang tulôt. Geukheun bak jih teungoh ji lhôh droe bak kaca.
"Ho keunira lom dikah malam-malam? Kon kaduek di rumoh ka kateupeue peunyakét diluwa."
"Ma, nyoe bèk susah Dron. Lôn kon kujak meu'en. Kujak keuliléng ramè-ramè, meudo'a tulak bala." Seu-ôt si Farid sira jipeutimang kupiah aji.
"Allahu Rabbi, Aneuk lôn bak meutuwah, beukaya, beumubahgia keuh, beumeutumée judô lagèe Ma si Bila, bèk kajak hai Aneuk, kadeungoe Ma. Ulama kaleueh geupeugah, Pak doto kaleuh geupeugah. Bèk that tajak bak ramè-ramè ilèe. Meuseumayang mantong leubèh got di rumoh inoe siat." Ma karab tijoh ie mata.
"Tapi nyoe do'a tulak bala, Ma. Kon bak keudè kupi."
"Teuma kapiké lé kah, kutham han kubi jak bak keudè kupi, pakon? Sebab ramè-ramè keuh. Kon han kubi jib kupi. Kah kajak ikula ka glah lhée SMA padahai. Meusapeue tan muphôm ata lôn peugah."
"Dron bèk yoe, Ma. Nyoe ata ulama peugah cit. Kon di Jakareuta mantong sidéh na ulama. Sinoe na cit. Nyoe do'a tulak bala. Nteuk na suwa saboh sapo ata bak Yahwa Suman, geupeugah lé Yahwa Suman, nyo na suwa tanyoe aman."
Ma si Farid meu asék ulée. Sakét até geuh. Aneuk leubèh jideungoe Yahwa Suman daripada Ma ih.
"Beh keupeue suwa lom jinoe, lampu that jai rata sagoe?"
"Nyangkeuh dron hana muphôm, hai Ma."
Farid, aneuk muda glah lhèe SMA, jijak laju hana dikira Ma susah. Moto cit kana dikeue gang. Ngon-ngon jih punoh saboh moto pick up itam. Lam malam geujak meudo'a. Ma dirumoh rô ie mata.
Hana tréb. Trôh woe si Farid jijak intat ngon Honda.
"Ma... Ma.... Neubuka laju pintô..!" Rahung si Farid diluwa.
"Pakon kawoe?! Hana jadèh kajak meudo'a? Peue goh jeuet ka hapai do'a lom?" Lagèe béasa Ma geutumpang keu-ieng bak babah pintô.
"Ma... Jak tajak rumoh sakét. Ilôn ka tutông jaroe ngon suwa. Paki nyoe? Peudéh that, huaaaa.... ."
"Han ék kumurusan di lôn. Kaleueh kupeugah han kubi jak. Nyan bak rumoh sakét PDP corona that jai. Kapakat jak Yahwa Suman keudéh. Kon gobnyan nyang peugot suwa?! Ka éh kah-kah laju bak rumoh sakét. Han ék kupeutimang lé. Di ék darah kuh tiep uroe. Can pansan lôn-lôn."
Bhuuum.
Keunarang @Ismi Marnizar
0 Response to "Suwa Tutông, Calitra Sosialisasi Bèk Teupèh Virus Corona (2) "
Post a Comment