That Kanjai! Teungöh Leumak H'uep Sabu, Ka Trôk Peulisi Jak Beureukah
Nasaja Berita – Banda Aceh, Tim Satuan Reserse Narkoba (Satrresnarkoba) Polresta Banda Aceh baroesa uroe Rabu (4/9/2019) jijak beureukah 4 droe aneuk muda nyang h'uep sabu-sabu. Sidroe awak Batam, lhèè droe awak Aceh.
That teuböh biet buet nyang jipubiet. Gadôh jih'uep sabu-sabu. Adak meujih'uep pu-pu laén kön hana meudalèh. Keupu sabu-sabu.
Nyang dari Batam, nan jih Aprianto (24 thôn) buer siuroe-uroe keu buruh bangunan. Awak peugöt-peugöt rumoh atawa keudè. Lheuh nyan M.Iqbal (27 thôn) awak gampông Punge Jurông, Roni Munandar (23 thôn) awak Jeulingké, saboh gampông ngön kantô Polda. That paloe jih. Hana yöe jih meubacut. Padahai peulisi dum hinan lam gampông Jeulingké nyan, hai Mapolda hinan. Teuman kön meudum, dum töh jai peulisi.
Nyang teurakhé awak Babah Bulôh, Sawang, Aceh Utara, nan jih Zulfikar (24 thôn). Pu buet jih keunan u Banda pih di jih. Gob umue dum jih jijak u Banda jijak kuliah atawa jak keurija. Jih jan h'uep sabu-sabu keunan. That phak kiraju.
Nyang brat gura lom, man lhè droe awak Aceh nyan nakeuh redivis kasuih narkoba. Na neuteupu pu arti jih redivis nyan. Apa pih tan meuteupu, makajih Apa peugah gura. Bak sang, awak nyang kalheuh jibeureukah sigöe, lheuh nyan jih'uep lom sabu-sabu 'iek asèè nyan.
Info phôn jih dari masyarakat seubab ka syök geuh bak saboh rumôh kos atawa rumoh kontrak di gampông Peurada, na awak h'uep sabu-sabu. Meunan geupeugah lé Satresnarkoba AKP Boby Putra Ramadhan nyan.
Watè jibeureukah lé tim, si Aprianto nyang meuteumeung. Lheuh jidrop, kapayah 'meunyanyi" jih. Han ék jitheun keunöng sidroe. Hinan keuh jiteupu lé peulisi bahwasajih na lhè droe teuk. Nyang keuh awak Aceh nyan, M. Iqbal, Roni Munandar ngön Zulfikar.
Hayeu jih hana meusigö mandum. Phôn lheuh si Aprianto, meusoe si Zulfikar, seubab hinan jibloe. Lheuh nyan bak jiparéksa si Zulfikar lé peulisi, jipeugah jih keuneuk publoe keu si Roni Munandar saboh pakèt. Meujibeurkah teuk si Roni Munandar. That kanjai kiraju.
Seudang si Zulfikar jicok sabu-sabu bak si F, nyang jinoe teungöh jipeucrok lé peulisi. Hai DPO, teuman kön teungöh jimita atawa jipeucrok meunyo lam basa droeteuh.
Nyan man 4 awak nyan ka keunöng pasal. Hana teuingat Apa alèh pu-pu pasal dum watè geupeugah lé peulisi bak acara Konferensi Pers uroe Jeumeu'at (6/9/2019) baroe.
Tapi bak Beritakini na geutuléh lé A. Putra. Apa hinan meubaca beuklam. Hinan leungkap jituléh pu-pu pasal nyang meukumat ngön hukôm untuk jiprosèh awak nyan man peut.
0 Response to "That Kanjai! Teungöh Leumak H'uep Sabu, Ka Trôk Peulisi Jak Beureukah"
Post a Comment