That Na Teuh! Pakon Jipeucrok Useutad Firanda Andirja Dari Aceh
Nasaja Berita - Banda Aceh, Keujadian jih ka mulai uroe Hameh tanggai 13 baroe ka. Leupah juwah-juwah awak Aceh neukiraju. Useutad-useutad nyang jak seumeubeut ji peucrok dari Aceh. Hireun dum ureung. Pu lom meunurot haba useutad nyang jipeucrok dari Aceh nyan jipeugah malem raya. Geujak beut di Madinah sideh, kon cuma geujak beut, geuseumeubeut lom. teuman kon meudum, dum toh malem di useutad nyan.
Baroesa info troh bak Apa, teuman han jeut meutuleh sapu neukiraju. Leupah gura. Nyo kajeut, bah pih teulat siangen, ta tuleh ju. Seubab mantong panaih bhah nyan bak pesbuk Apa kalon. Sampe u luwa nanggroe sibok bhah nyan.
Jadi Apa tanyong lah bak Teungku di gampong Apa, pakon ek ji peucrok useutad nyan, padahai bak ta deungo calitra ureung, malem useutad nyan. Geujaweub le Teungku nyan nyang bahwa useutad nyan Wahabi. Useutad nyan seureng peugah mulod bid'ah, jak meudo'a bak kubu syirek.
Nyan Apa duek peugah haba ngon Teungku nyan bak keudee kupi. Apa tanyong lah, teuman kon biasa meunyo na bida-bida siangen. Apa pura-pura hana meuphom lah, mangat geucalitra beu leubeh paih. Hai jurnalieh bak teumanyong kon beu leumah bangai. Meunyo sok tahu, hana meuteume info sapu.
Lheuh nyan geujeulaihkan siangen tuk le Teungku nyang bahwa useutad Firanda Andirja ji peugah Allah ta'ala geuduek sideh di langet, meujaroe, meugaki. Nyan hana seusuai deungon aqidah Ahlussunnah wal Jama'ah nyang na di Aceh. Bahkan MPU di Aceh leupah trep ka meutham paham model nyan.
Bahkan kheun Teungku nyan bak Apa, nyang bahwa useutad nyan jipeugah ureung nyang meuaqidah Asy'ariyah salah, menyimpang, sesat. Aqidah Asy'ariyah nyan nyang keuh nyan aqidah geutanyoe aswaja, nyang beut sifeut 20. Meunan calitra Teungku bak Apa.
Nyan rupajih seubab baro Apa teupu. Rupajih saboh leumboi ngon Useutad Parhan Abu Puraihan nyang tom Apa peu-ek lam berita phon jameun. Han meuteume raba silop watee jigeurtak le ureung nyo bak Seumijid Rumoh Saket Zainoel Abidin Banda Aceh.
Meunyoe keu ureung nyang meureunoe sifeut 20 jikheun seusat, kakeuh abeh seusat dum ureung di Aceh. Padahai bak indatu teuh kon ka ta beut sifeut 20 nyan. Dan indatu geutanyoe sit ureung malem dum, ureung-ureung nyang ba Islam ban saboh Indonesia Raya.
Bahkan kheun Teungku nyan, 80 ureung Islam dan ulama nyang na lam donya nyo meuakdah saban lagee tanyoe, Asy'ari, meureunoe sifeut 20. That na teuh, rupajih troh bak ayat nyan malem geuh, malem bak geupeusisat geutanyoe.
0 Response to "That Na Teuh! Pakon Jipeucrok Useutad Firanda Andirja Dari Aceh"
Post a Comment