Malam Puasa Jireupah Taih Doto di Jalan Jangka, Honda Reubah, Tuleung Rusok Patah
Nasaja Berita - Bireuen, Nasaja keujadian lam buleun puasa. Pakon meutamah paleh ilee ureung nyang na di Aceh lawet nyo. Di Aceh Utara jipoh inong ngon aneuk. Di Bener Meriah jirampok peng toke kupi. Di Takengon jireupah harta ureung meukat gulee, di Matangkuli jiteunak awak keurija bak Indomaret. Hana le Aceh, ka reulee laju-laju hoe si uroe.
Malam Aleuhad baroe, Sabtu tanggai 11/5 seukitaran poh suteungoh sikureung, jireupah taih ibuk doto bak jalan Jangka. Teungoh ureung jak bak teuraweh, jimeurampok kiraju.
Cut Syarifah Maisura, na umu seukitaran 28 thon, ureung Gampong Bugak Krueng, Jangka, Bireuen bak geuwoe dari arah Matang u gampong, ji peutoe le ureung troh keunan daerah Paya Bieng. Sidroe geuwoe ibu doto. Meunurot geupeugah le suami geuh, memang han geubie jak tueng, takot tinggai seumayang teuraweh eunteuk. Jeut geuwoe sidroe. Teuman malam nyo ka mawot.
Memang daerah nyan sit agak supot bak jalan, seubab hana lampu bineh jalan. Pu lom buleun hana get trang lom inoehat malam. Baro 7 puasa.
Jadi troh keunan, ka meurasa ju di ibuk doto nyan, lagee sang na ureung ikot dari likot. Teuman salah bacut, roh geulansam honda. Hinan ju jireupah taih le awak ilikot nyan. Sangkira geubalap mungken akan laen keujadian jih. Teuman ata ka mawot kiban ta peugot teuman.
Wate jireupah taih, hana meuteume, mantong meusangkot bak jaroe. Teuman hai ureung inong ba honda, laju goyang, meuwet lam parek bineh jalan, meutimphan laju. Taih han jiteume tarek. Ureung reubah, laju jibalap ureung agam nyan. Leupah paleh kiraju. Di ibuk doto tuleung rusok patah. Alah hai ma beh teuh. Alah na ureung lewat hana trep bak nyan. Padahai nah, lam taih quran nyang na. Nyan keu tanda ureung jroeh neu kalon, lam buleun puasa, geuba quran sajan, mangat jeut geu beut-beut keudroe geuh.
Troh keunan, geutulong geumee u puskemas. Nyan neukalon, mantong na ureung got akai sagoe nyan, geutem tulong. Lheuh nyan jirujuk ju keudeh u ruoh saket Jeumpa Hospital di Bireuen. Troh u rumoh saket bak ji lhoh le doto bak ronsen, keubiet nyoe, kon meuayang, tuleung rusok patah wie uneun. Harus operasi, teuman hana doto bedah tuleung di Bireuen, ka suah rujuk u Banda. Alah hai teuh, jeh uroe raya dikeu mata.
Nyan meunanlah kira-kira keujadian nyang geucalitra le Pak Kapolsek Jangka, Ipda Syahrizal watee geukonfirmasi keujadian nyan le Bang Fajri Bugak seulaku jurnalieh dari Dialeksis.com bak uroe Aleuhad baroe tanggai 12/5. Apa sinan bak Dialeksis nyan meubaca.
0 Response to "Malam Puasa Jireupah Taih Doto di Jalan Jangka, Honda Reubah, Tuleung Rusok Patah"
Post a Comment