Ayah Panti: Cara Ta Bela Ulama, Ta Hadir Bak Majeulis Beut Ulama
Nasaja Berita – Samalanga, Lawet nyoe kareuna teungöh gabuk ureung Aceh lam bhah bela ulama seubab na sidroe ureung nyang ka hana sehat le lam seumike. Maka rame sit lembaga dakwah atawa komunitas agama nyang peugöt pembelaan keupada ulama di Aceh, terutama Abu Syeikh Hasanoel Bashry atawa Abu Mudi. Guree geutanyoe bersama.
Na nyang ka lapor bak peulisi. Nyan saboh upaya hukom nyang ka teupat geucok le rakan-rakan Teungku laen. Teuman pu keuh harus mandum geutanyoe jak lapor? Teunte hana. Ta harapkan useuha para Teungku nyang ka geujak teumpuh jalur hukum, beu na hasil. Geutanyoe nyang awam-awam, bah pih saket that hatee atawa meudarah hatee, bek sit teuga that ta teumeunak bak ta bela ulama atawa guree geutanyoe. Seubab nyan cara nyang hana jroeh.
Ka si gö dua gö ta peuleuheuh brön, nyan sit ka meudarah gapah, bak buet teumeunak di geutsnyoe Aceh, rata-rata. Nyoe kön ta biarkan dan benarkan teumeunak. Hanya saja bek leupah-leupah that. Pu lom na ka tom ta deungö-deungö beut kadang bak balee atawa meulasah di gampong-gampong teuh. Meunyoe ka lam dayah, adak meujeut bek le meunan.
Bagi tanyoe nyang cinta keu ulama, peurle ta teupu nyang bahwa salah saboh cara paleng jroeh untuk ta peuleumah cinta keu ulama nakeuh deungön ta jak beut. Ta ikot hadir lam majelis ilme ulama.
Malam nyoe na Abu Mudi nyang akan seumeubeut Tastafi di Seumijid Raya Baiturrahman Banda Aceh. Tajak peurame. Terutama keu syedara nyang na di kawasan Banda Aceh-Aceh Rayek. Nyan cara paleng jroeh untuk ta peuleumah rasa cinta keu ulama. Seubab ulama nyoe ureung angke ilme, maka ta cinta ulama beu ta cinta keu ilme nyang na bak ulama. Cara jih ta jak bak beut. Ta hadiri majeulis beut nyang ka na di seukitaran geutanyoe.
Ayah Panti (Pimpinan Dayah Harapan Ummat, Arongan Simpang Mamplam, Bireuen. Alumni Dayah Mudi Mesra)
0 Response to "Ayah Panti: Cara Ta Bela Ulama, Ta Hadir Bak Majeulis Beut Ulama"
Post a Comment