Brie Bantuan Keu Teungku Halim di Lueng Angen, SAPEFAM: Jak Saban Ta Bantu
Nasaja Berita - Lhoksukon, Cukop meutuwah Teungku-Teungku dan rakan-rakan nyang na di seukitaran Lhoksukon kalinyoe. Ka seumaken jroh dan seumaken na rasa padoli keu seusama droe. Nyan ban neukiraju. Ureung nyoe teugabong lam saboh wadah komunitaih nyang geupeunan Sapefam. Nan memang gawat siangen, seubab sit ata geusingkat dari kalimat Santunan Pendidikan Fakir Miskin.
Kalinyoe nyang geusantuni atawa geu brie bantuan le ureung lam Sapefam nyoe nakeuh Teungku Abdul Halim nyang teungöh jak beut di Dayah Darul Huda, Lueng Angen, Lhok Nibong.
Teungku Abdul Halim sidroe santri di Dayah Lueng Angen, asai gampong Pante Gaki Bale, Keucamatan Langkahan, Aceh Utara. Meunyoe ta kalön dari nan gampong, sit ka meuhie ju sinan sang ramee ureung jak beut. Hai Gaki Balee, meunyoe Apa Raban biasa bak gaki rinyeun meuduek deungön beut jameun. That beuö ek ateuh balee, meunyoe golom keunöng seupöt ngön awe atawa taloe tima sit hana ju. Makajih le that surah nyang hana get meudeungö. Teuman meunyoe ureung gaki balee, leubeh bak Apa neukiraju. Ureung nyan geu gaki balee, meunyoe hana gaki balee han teudöng balee. Nyan ban hai rakan.
Boh ka, di Teungku Abdul Halim nyoe sidroe aneuk ureung nyang hana sapu na, sinyak dari Teh Jamilah. Ayah Teungku Halim hana le, watee manyak-manyak jameun ka hana le. Nyang buet siuroe-uroe jak tueng upah seumeurhah bak gob, kadang jak pileh boh pineung bak lampoh gob. Kön geucue boh pineung beh, bek salah meuphom. Tapi jak tueng upah pileh boh pineung keu poe lampoh. Meuhan geu tueng upah jak seumomprot lam blang. Ukuran han ji teume tho ie reuoh awai, ka ji teubiet ie rueoh laen. Nyan keuh meunan meunyoe Ma keu aneuk. Nyan jihad Ma keu Aneuk, keu bloe kitab untuk jak beut lam dayah.
Neupateh Apa peugah, nyan calon ulama rayek Teungku Abdul Halim nyan. Do'a Poma, ngön Guree. Useuha Poma mita raseuki, useuha guree iklaih seumeubeut, useuha droegeuh Teungku Halim bak jak beut. InsyaAllah lam donya bahgia, uroe dudo meureumpök syiruga.
Aleh pakön Apa teuingat keu sinyak droe, watee tuleh berita nyoe. Sang keuneuk roe ie mata neukira ju. Sangkira awai matee Apa, tinggai Da Mulah nyang jak tueng upah mita beulanja keu sinyak. Allahu teuh neukiraju.
Teh Jamilah kön saboh tok sinyak geuh, na adoe dari Teungku Halim lom nyang mantön SMP glah Sa. Teuman meunurot info, adoe nyan beda Ayah ngön Teungku Abdul Halim. Dan hanjeut keu masalah, nyang inti keuneuk peugah Teh Jamilah suah keurija uroe malam, brie nafakah keu dua droe aneuk. Rencana Teh Jamilah, keuneuk jok bak Dayah sit, lheuh tamat SMP teuman singöh.
Meunyoe keu kondisi rumoh Teh Jamilah, han meu tatu'oh peugah pih, di tireh, singet u wie, magun ngön kayee, alah ma beh teuh. Han meu ta tu'oh ceurita pih neukira ju. Han ji theun jantong teuh.
Neubantu hai syedara meutuwah. Nyan aneuk nanggroe, ureung hana sapu na, ji tem jak beut tuntut ilme Agama. Nyangkeuh nyan nyang tem meureunoe lam dayah nyang jeut keu ulama.
Meunyoe keu info, kiban cara neubantu, atawa hawa ikut bantu sajan ureung Sapefam, sinoe neu klik mangat seip info atawa keudeh langsong bak Teungku Musliadi. Neu klik ju sinan nyang bak tulesan teubai nyan, langsong ji ba droeneuh le internet bak pesbuk ureung nyan.
0 Response to "Brie Bantuan Keu Teungku Halim di Lueng Angen, SAPEFAM: Jak Saban Ta Bantu"
Post a Comment