Tim Jokowi Aceh Jak Saweu Tersangka Video Sinterklas

Nasaja Berita – Banda Aceh, Lheuh jeumeu'at satnyoe na troh ureung kirem link berita dari LiputanAceh.com , teukeujöt Apa-Apa rap teurhok kupi ateuh layeu laptop lom si gö treuk. Kiban han roh, berita awak Jokowi troh jak saweu bang S bak Polda. Apa pike ji keuneuk hambo bang S.

Rupajih lheuh ji pareksa, bang S nyang dari Aceh Utara nyan kön awak edit, tapi awak share sagai. Hai salah sit jak share-share nyan, hana meupu cap. Adak meu berita Apa Raban tuleh bak nasajaberita.com hom lah neu share. Paleng han keu meudonya basa endatu teuh. Bah pih tulesan lagee pliek teulheu meunoe. Awa rawi haba bak keure kupi. Kaedah hana, ilme bahasa tan, neukiraju. Pokok jih lam basa Aceh nyang mudah neu meuphom.

Böh ka, bek le Apa promosi nasajaberita, bah ta woe bak asoe berita ile. Teuga that ji ruwe, hana meuhoe gisa eunteuk.

Nyang jak saweu na dari awak Nasional sidroe. Ureung droe teuh, ureung Aceh. Tapi lam tim Jokowi meunasional meunan neukira ju. Waki Ketua Teman Jokowi, Bang Samsol Ibrahim. Na sit nyang korwil Samawi Aceh, Haekal Afifa. Ulama Muda Jokowi, nyankeuh nyan nyang that meusyeuhu bak pesbuk neukira ju. Meusalop ji teunak gara-gara peugah ulama muda. That teuböh neukira ju. Na sit dari NU, Teungku Muslem Hamdani, ketua Pergunu Aceh. Dan lom Tgk Marbawi, Sekjen RTA, Rabitah Taliban Aceh.

Sang bunoe Teungku Marbawi nyan khatib watee Apa Raban jak jeumeu'at bunoe bak seumijid daerah Ulee Kareng, lagak that geu khutbah. Meuhie ju ureung malem. Apa pujo bacut, seubab mangat seunang geuh beliau nyan. Hai keu khatib kön beu get-get ta peugah, meuhan ka hana jadeh sah jeumeu'at teuh bunoe.

Seubab Bang S nyan dari ureung Dayah, maka geujak lah padum-padum droe ureung dayah nyoe jak brie dukungan moril keu bang S. Meunan geupeugah le Tgk. Haekal Afifa. Pu lom kalheuh lakee idin dan koordinasi ngön Waled Nu Samalanga seulaku Rais Syuriah PWNU Aceh dan Lem Faisal seulaku ketua PWNU Aceh. Karena lam video nyang ji edit video KH. Makruf Amin, ureug rayek lam NU dan MUI di Indonesia. Jeut keu calon waki Jokowi bak Pilpres kalinyoe.

Amanah Waled ngön Lem, yu kawai, yu peungön nyan rakan teuh nyang ka silap. Hukom teutap, hanjeut ganggu gugat. Meunan geupeugah le Tgk Haekal. Bek sampr alee di gop, leusong di gop. Tanyoe keunong drop hana peukareuna. Nyan ban geu canek haba le Tgk Haekal. That get jeut geuh. Meunyoe bak Apa neu yu canek, meunoe kheun Apa, "Leusong di gop, ale di gob. Teuga that ji top keunong jaroe teuh luka". Pokok jih Apa han theun talo neukira ju.

Peuleuheun that syara meutuwah. Nyoe kön bhah cebong kampret beh. Apa peu tut-tut si gö teuk. Nyoe haba peuingat. Bek meuka neu share ju pu nyang deuh bak beranda pesbuk. Keucuali dari nasajaberita. Neu share meu wablah gö sapoe ju. Hana meudaleh sapu pih.

Share this post