Ka Jaya! Bupati, Waki Bupati Ngon Pimpinan DPRK Pidie Jaya Ek Moto Mewah
Nasaja Berita - Pidie Jaya, Memang bereh that peujabat bak kabupaten Pidie Jaya neukiraju. Hana tre ban lheuh jilantik, langsong geukeurileng moto baro. That meuraseuki keubiet daerah nyan.
Hai nyo hai, ci neukalon bak berita nyang jituleh le awak nyoe dum pat laen, jipeugah bupati Pidie Jaya, Aiyub Abbas atawa pak Cek awak nyoe, meuganto moto dinaihdeungon yum hana kureung bak 1,27 Miliar. Seudangkan pak Waki Bupati yum moto 1,25 Miliar, bacut sagai talo ngon Pak Bupati.
Teuman pu merek moto nyang dum nan yum? Nyang pasti ile kon Avanza ata biasa awak nyoe rental jak meu'en. Tapi kalinyoe Toyota Alphard barang. Han meutatu'oh kheun pih, rap ji bapoe ie babah teuh. Meunyo Pak Waki Bupati geu ek Toyota Vellfire, nyan brat teuh lom bak ta kheun.
Padahai nah, segolom jih Pak Bupati ka agak that moto, Toyota Fortuner. Leupah gap moto nhyan keubiet. Ukuran meunyo keuneuk jak u Jim-Jim, adak brok jalan siangen, mudah. Hanjeut that keu masalah. Meunan sit Pak Waki Bupati, Toyota harrier geu ek. Saban model sit. Ukuran jeut ek gle. Adak lam kota pih reman moto nyan.
Teuman meunyo Alphard, bek ta kheun u Jim-Jim, meu u Jangka Buya agak brat teuh bacut. Bak takalon hie sang meunan. Teuman aleh keubiet nyo meunan pih hom. Hana tom ta ek seubab. Paleng hayeu ta ek, nakeuh Hi-Ace, nyan pih ata bak jalan.
Di Pimpinan DPRK pih han tem talo kalinyoe, bah pih yum jih leubeh murah siangen. Pajero Sport keunong neukiraju. Na 4 droe, ka keuh 4 boh. Na yum saboh-boh moto yan meu 673 juta rupiah.
Teuman bek neubayang-bayang le ureung droeneuh rakyat Aceh, meunyo dum nan peng, padum boh rumoh ureung gasien jeut tapeugot, padum boh kios jeut ta bangun mangat jeut jimeukat ureung hana buet lam gampong, atawa neujak bayang-bayang pu laen. Bek! Bek neujak coba-coba. Saket ate neuh eunteuk. Nasaja kiraju. Apa baca bak rap rata media onlen di Aceh meunan jiberitakan keujadian di Pidie Jaya. Brat jaya ka pidie blah nan. Salah saboh jih bak Bacakota.
0 Response to "Ka Jaya! Bupati, Waki Bupati Ngon Pimpinan DPRK Pidie Jaya Ek Moto Mewah"
Post a Comment