Wabup Aceh Rayek, Waled Husaini dan BPBA Aceh Bantu Ureung Tutông Rumoh
Nasaja Berita – Aceh Rayek, Badan Penanggulangan Bencana Aceh (BPBA), Uroe Seulanyan, 26/08/2019, ka geubantu peugöt keulayi rumoh Tgk Razali nyang tutông bak awai buleun Aguhtuh baroesa nyan na di Gampông Lam Batèe, kecamatan Simpang Tiga, Kabupaten Aceh Rayek. Lam Batèè tinggai ureung Aceh Rayek, bèk neupiké kiban.
Bantuan nyang geujôk nyan nakeuh dabeueh-dabeuh atawa barang lagè seumen, anoe, sèng, kayeè, papeun, dan laèn lom nyang han mungké Apa tuleh mandum. Teungöh jai that jamok pih bak jikeuramien Apa kiraju.
Bantuan nyan, geujôk lé pihak BPBA Aceh meulalui Kabid Kedaruratan dan Logistik Ir M Syahril MM bak Teungku Waki Bupati Aceh Rayek, Waled Husaini Seulimeum.
Lheuh nyan, lé Waled Husaini Seulimeum langsông geu peujaroe atawa meunyö lam basa buku geukheun serah terima sicara simbolih bak Tgk Razali. Ureung nyang tutong rumoh nyan.
Payah tatuleh beujeulaih. Bèk neupiké eunteuk keu Apa geujôk bantuan.
Tgk Razali nakeuh sidroe pimpinan Dayah Darul Mukhlisin bak Gampong Lam Batèè nyan.
Bunoe Wabup Aceh Rayek, Tgk Husaini A Wahab atawa Waled Seulimeum, geu peungön le Kabag Humas dan protokol Setdakab Aceh Rayek, Bapak Muhajir SSTP MPA, that panyang titel pak Kabag nyoe biet. Ta maklum gobnyan rajin geujak sikula awai, kön lagei Apa lalèè drop aneuk miriek jameun lam blang.
Waled Husaini Seulimeum geu peusampoe teurimœng geunaséh nyang lambông leupah na dan manyang that-that keu BPBA Aceh nyang kageutém bantu peuphui beuban Tgk Razali.
"Mudah-mudahan bantuan nyoe meu manfaat keu Tgk Razali meunan cit keu keuluarga." Kheun Wabup Aceh Rayek nyan.
Bacut Apa rawi keulayi uroe nyan bak tanggai 5 Aguhtuh 2019, rumoh Tgk Razali habeh tutong, untong that lam musibah nyan hana kurbeun ureueng, tapi nyang brat that weueh Apa, mandum habeh tutong, pupue nyang na lam rumoh Tgk Razali habeh mandum, weueh Apa, alahna geujak Waled Husaini Seulimeum bak uroe tutong geujak hibur dan geu intat seudeukah pu-pu yang na mudah aju wateè nyan, lheuh nyan bunoe ka geubantu peugot rumoh lom.
Meunurot info nyang Apa teupue rap 75 juta rupiah nyang geubantu bunoe. Alhamdulillah tnay neukiraju.
Bak Apa doa mantong. Ureueng droeneuh nyang baca berita nyoe neubantu pu nyang jeut. Paléng kureung doa keu poe rumoh, keu nyang brie bantu dan keu Apa nyang tuléh berita. Nasaja kiraju.
0 Response to " Wabup Aceh Rayek, Waled Husaini dan BPBA Aceh Bantu Ureung Tutông Rumoh"
Post a Comment