Ka Paléh! 300 Boh Drom Minyeuk Jipeumusnah di Aceh Timu
Nasaja Berita – Aceh Timu, Polres Aceh Timu baroe ka abéh jitöt minyeuk bumoe nyang geukuh lé ureung gampông hinan. Hana kureung bak 300 boh drom atawa seukitaran 60 ton minyeuk jipeumusnah. Seubab meunurôt lam hukôm neugara minyeuk nyan ilegal.
Minyeuk nyan dumnan le ata ka jipeusapat dari buleun 5 sampé buleun 12 thôn 2018 baroe.
Lokasi teumpat jipeumusnah ubé na minyeuk nyan bak saboh lampoh soh di gampông Alu Bu Jalan, Peureulak Barat, Aceh Timu.
Lam acara nyan na hadir Kasat Reskrim Polres Aceh Timu AKP Dwi Arsy Purwoko, Kasubsi Eksekusi dan Eksamasi Kejaksaan Negeri Aceh Timu Harry Arfhan, Panitera Muda Pengadilan Negeri Idi Raden Budiawan, Kepasa Operator Metrologi Dinaih Perindustrian Kabupaten Aceh Timu M Suriyadi.
Barang bukti nyang jipeumusnah nyoe mandum ka P21 dari Kejaksaan Negeri Aceh Timu dan na padum boh kasus nyang kalheuh jipeuputôh lé Pengadilan Negeri Idi deungön vonieh nyang beda-beda. Mulai dari 1,5 sampé 2 thôn." Kheun Kapolres Aceh Timu AKBP Wahyu Kuncoro meulalui Sat Reskrm Polres Aceh Timu, AKP Dwi Arsy Purwoko.
Lanjôt gobnyan, mandum barang bukti nyang geupeumusnah nyan awai jih geukeubah bak gudang Gardu PLN Idi sidéh di Gampông Paya Bili. Teuman lé poe pihak gudang PLN nyan jikeuneuk ngui keudroe gudang nyan.
Maka pihak peulisi geu meupakat ngön Kejaksaan Negeri Aceh Timu dan Pengadilan Negeri Idi.
"Cara ta peumusnah jih deungön cara ta tet. Phôn ta kuh uruek ilè beu raya. Seukitaran 30 mete luah jih dan na lhôk meu 8 mètè. Ta rô teuk ubé na minyeuk keunan lam uruek nyan, barô ta tet." Meunan geuungkap haba lé Pak Peulisi nyan. Nasaja kiraju.
Rupajih leubèh that kaya tanoh Aceh nyoe. Awai ta deungö di Arab meunan, geukuh mön minyeuk geuteumeung, kön ie. Di Aceh, minyeuk meuteumè, ie pih leubéh barang.
Teuman seubab leumöh pikèran, han sép ileumè nyangkeuh lagè haba nyan. Han ék takelola. Dum nyang na suah tet, seubab hana idin, meukaleung ngön hukôm neugara Indoneh. Dan lom pih sit han layak keurija, seubab hana aman. Lagè seutandar awak lua nanggroe.
Makajih kajeut jak sikula bhaih minyeuk dan pertambangan dum aneuk Aceh. Ka jameun ka tapeugah-peugah, tan soe pakoe.
Meunan Apa baca bak AJNN padum uroe ka u likôt. Ka teulat meupeu ék keunoe bak nasaja. Kajeut sit teulat, daripada tan meusikhan.
0 Response to "Ka Paléh! 300 Boh Drom Minyeuk Jipeumusnah di Aceh Timu"
Post a Comment