Meulaboh Pih Ka Ji Papji, Panitia: Hana Pat Peubateu Le Acara
Nasaja Berita — Meulaboh, Rupajih seulaen di Sigli di Meulaboh pih jadeh ji peugöt turnamen PUBG nyang ka lheuh geufatwakan hareum le MPU Aceh lam padum uroe nyang ka u likot.
Meunyo di Sigli turnamen lam dua uroe 21-22 Juni di Meulaboh 2 uroe sit, 22-23 Juni. Teuman keu hadiah leubeh rayek di Sigli, 20 juta, seudangkan di Meulaboh 15 juta rupiah. Ka paih kiraju.
Meunurot Apa baca bak AJNN nyang geutuleh le Bang Darmansyah Muda, panitia kalinyo hana pat ji peubateu acara nyang ka awai jiseutel untuk jipeuduek turnamen nyan. Bahkan ka seukitaran 2 buleun u likot ka ji buka pendaftaran. Meunan jisampaikan le Riko Maharsi.
Riko, seulaku panitia jisampaikan bak wartawan, nyakni awak AJNN nyan nyang ka pasti, kön bak wartawan Nasaja Berita, seubab Apa hana troh meujak u Meulaboh lom. Wartawan tunggal Apa lam Nasaja Berita, jiteume apoh apah kiraju bak mita beurita, meu Da Mulah han geutem teumuleh.
Pu teuman ji peugah, nyang bahwa acara turnamen nyan ka awai ka meurencana, jadi hana pat ji peubateu. Pu lom meunurot ji peugah na awak luwa Aceh nyang jak ikot meu'en la turnamen game PUBG nyan. Meunyo jipeubateu hana pat pulang peng gob dum. Jadi daripada rugoe kakeuh teutap jilanjot acara nyan.
Na 77 boh tim nyang meu'en kalinyo. Teuman saboh-saboh tim na 4 droe ureung meu'en. Neukali ju keudroe padum droe peserta nyang meu'en mandum. Apa han ek meukali le, kolotor ka abeh batere.
Panitia meubacut hana jiniet untuk ijak peukabeh fatwa MPU. Teuman nyo kondisi hana pat elak le. Meunan lah kira-kira haba dari panitia nyang na di Meulaboh.
Bagi Riko ngön rakan-rakan laen, turnamen nyan seubago salah saboh ajang silaturrahmi bagi gamers PUBG nyan.
Pu lom game e-sport lagee PUBG nyo ka meu internasional. Bahkan lam padum watee ukeu nyo akan na turnamen internasional tingkat asia. Nyan ban kiraju bak jisampaikan le Riko nyan.
Teuman seubab di Aceh ka jiteubiet fatwa hareum, kakeuh lagee haba itu ju. Nyang fatwa hanjeut ta peukabeh. Meuhan hana geutem pakoe teuh le singöh le ulama, abeh teuh. Si ubiet-ubiet ulama nyang keuh Teungku Imum gampog teuh. Matee geutanyoe tan soe tem seumanoe, na can suah ta manoe keudroeteuh. Nasaja kiraju.
0 Response to "Meulaboh Pih Ka Ji Papji, Panitia: Hana Pat Peubateu Le Acara "
Post a Comment