Ketua MARA: Bekna Nyang Peu Ulok-Ulok Fatwa Hareum PUBG
Nasaja Berita – Banda Aceh, Ketua Lembaga Pelestarian Seni Adat Dan Budaya Meukuta Alam Raya (MARA) Aceh Tarmizi Thaib geumusu cit bhaih fatwa MPU Aceh nyang ka geu peuhareum game online PUBG nyan. Lazemjih, mandum rakyat Aceh patot geu peusampoe teurimong geunaseh keu MPU kareuna kageutem peuteubiet fatwa nyan, supaya aneuk aneuk Aceh jeut leubeh produktif bak geumita ileumei, bek lalei duhong bak game nyan, rugoe ureung ureueng chik bak geutaguen bu. Yang ladom bajei bajei ka mubei banga hana ji seuk seuk bak meu'en game nyan.
Hireun teuh takalon komentar-komentar sikhan dua khan ureueng, na yang peu ulok ulok fatwa nyang cukop jroh nyan.
Geupeugah le ketua MARA, fatwa nyan bek ta peuulok-ulok dan tajak kheun beurangkapue keu MPU nyan kareuna le ulama ulama leubeh meuphom ata nyan brat keu mudharat daripada manfaat kiraju.
Adak di Apa Raban pih sep brat meuphom kiraju, man han that Apa keujeut peugah, ji ulok ulok Apa eunteuk. Neu niet aju nyang Apa neuk peugah ka geupeugah le ketua MARA nyan nah, Apa tukang tuleh mantong.
Meunyangkot pakon game nyan nyang geupeuhareum pakon hana zina, riba, korupsi, lagei nyang ji oek-oek le padum khan komentator dadakan bak medsos, bang Tarmizi Thaib droekuh wate Apa tanyong rap mirah muka geuh. Apa-Apa karap rhet glah kupi bakteeneuh. Tapi Alhamdulillah cit geutem jaweub nyang Apa tanyong.
Meunurot gopnyan, han sabe buhu meunyoe tajak peu antok antara game ngen ata nyang jibandeng bandeng nyan,seubab peukara zina, riba, korupsi nyan cit ka trang that that geu peuhareum le Allah Ta'ala lam Al Qur'an. Meu ureung jawai pih iteupue, maka jih geupeugah le ketua MARA, bek jak peu pungo- pungo droe ngat bek payah seumbahyang, neujak beut bak gure gure, meunan geu peu ingat le Bang Tarmizi Thaib nyan, sep brat saban lagei nyang kayem Apa peu ingat ingat lawetnyoe nah.
Lam hai laen, Ketua MARA geulakei watei terbukti na peulanggaran dan patot geujok hukuman,nyan bek sampe implementasi hukoman tumpoi u wateuh tincu uyup, soe mantong nyang meulanggeh beu saban mandum geuhukom,hana meuceh aneuk ureung gasien,adak aneuk ureung kaya atawa aneuk peujabat,neuhamok aju.
Ketua MARA geu apresiasikan niet get ketua Partai Daerah Aceh ( PDA) nyang lage geupeugah le Tgk. H. Muhibbussabri A Wahab bahwa peurte gopnyan akan geu peujuang fatwa MPU nyan beujeut keu qanun. Lagenyan nariet adak di Apa pih leumak mabok bak kudeungo,ukuran payah tamah kupi kupi lom kiraju,daleh pih nyang bayeu na ketua MARA nah.
Harapan gobnyan, mudah-mudahan Partai Partai laen pih sigra geu peuteubiet dukongan lam hai nyoe lagei Partai PDA nyan teuntei demi kemaslahatan generasi muda Aceh ukeue.
0 Response to "Ketua MARA: Bekna Nyang Peu Ulok-Ulok Fatwa Hareum PUBG"
Post a Comment