Milad Keu 814 Kota Banda Aceh, Eunteuk Malam Zikir Akbar di Lapangan Blang Padang
Nasaja Berita – Banda Aceh, Panitia acara Zikir Akbar Gemilang jinoe teungoh geupeusiap lam rangka peuingat Milad Kota Banda Acèh nyang keu-814. Sampe seupôt Hamèh baroe (25/4), leubeh kureung na seukitaran 30 boh tenda ka teudong, bak lapangan Blang Padang.
Bak geutarget le panitia, ureung nyang akan hadir beu leubeh siplôh ribèe droe. Teuman aleh ek troh target, malam singoh ta kalon. Meunurot cuaca. Lagee malam nyoe ka ujeun, han leupah tajak sahoe.
“Dari uroe Seulasa (23/4) ka ta mulai pasang. Tenda nyoe keu teumpat tameureului meunyoe jitoh ujeun watèe acara." Kheun ketua panitia, Teungku Alizar.
Meunan cit undangan keu jamèe VIP ngon jama'ah kalheuh geujak intat mandum geupeugah.
“Jamèe VIP dari kanto-kanto pemerintah Kota Banda Acèh dan peujabat laén, jama'ah dari gampông-gampông nyang na di Banda Aceh, dan lom PNS kota ngon provinsi mandum ta undang, seureuta deungon keluarga”. Tapi keu Apa hana troh undangan lom, sang meumada ngon undangan terbuka bak koran.
“Bandum na seukitaran10 ribèe undangan nyang ka kamoe intat uroe nyoe, meunan cit undangan keu bandum masyarakat. Tameulakèe bak Poe Allah ta'ala, malam singoh bek ji toh ujeun, jadi leubèh le jamaah nyang jeut ikot acara. Adak han lot di miyup tenda, jeut geuduek di luwa tenda.” Nyan ban geupeugah. Ka payah ta jak beuawai sang malam singoh, Da Mulah beu bagah geumeungui, meuhan ka payah duek di luwa tenda.
“Insyaallah Zikir Akbar Gemilang siap ta laksanakan Jeumeu'at (26/4) malam, atawa malam Sabtu.” kheun Kepala Dinas Syariat Islam Banda Aceh.
Wali Kota Banda Aceh Aminullah Usman geupakat ubee na masyarakat bak acara khanduri MIlad nyang tiep thôn na geulaksanakan le Pemko Banda Aceh. “Ta harap mandum, ubee na masyarakat beugeujak. Meunan sit jamèe dari luwa nyang ta undang. Meunyoe wisatawan muslim nyang jinoe na di Banda Acèh hadir ju, hana pu-pu.”
“Nyoe acara tanyoe, acara droeteuh, tapeuingat uroe lahee Kota Banda Aceh nyang keu-814 thôn." meunan geupeugah le Pak Wali. Teuman bak geukheun uroe lahee kon beurarti lahee lagee lahee aneuk miet beh. Nasaja kiraju.
"Sira tasambôt buleun puasa 1440H. Jadi saban-saban ta meuzikir, tameudo'a, tameulakèe bak Poe teuh Allah ta'ala, kota tanyoe nyoe ukeu beu meutamah maju seureuta masyarakat beu meutamah sijahtra,” sambong Pak Wali.
Nyang akan brie tausiah atawa ceuramah nakeuh Tgk Salman Saf. Nyang pimpin zikir eunteuk Tgk Asy’ari Ibrahim. Nyan mandua hana Apa turi. Tapi Apa yakin ureung droeneuh neu turi.
Meunyoe nyang pimpin do'a, Tgk Syukri Daud, sang Tgk Syukri Daud nyan Tgk Syukri Pango, murid Abuya Amran Waly, rateb siribe.
Nyan neujak bak zikir. Bek beunak hatee neuh. Pu lom lawet nyoe gadoh neumeupake bhaih peulitek Prabowo ngon Jokowi, keu soe lheuh Presiden awak Indoneh. Nasaja kiraju.
Nyan Apa baca bak Liputanaceh.com dan bak web Bandaacehkota.go.id, meunyoe poto ata bak google, aleh supoe, ka tuwe Apa, nyang pasti nyan ata thon 2018 baroe.
0 Response to "Milad Keu 814 Kota Banda Aceh, Eunteuk Malam Zikir Akbar di Lapangan Blang Padang"
Post a Comment