Lagee Mak Makhes, Teuga That Geubalap, Haji Uma Ka Pasti Ek Podium
Nasaja Berita - Banda Aceh, Keubiet lagee ji balap honda bak Moto GP kiraju. Lheuh keu Haji Uma, laen overlap mandum. Meublah-blah bak tiang tinggai, meunyoe kheun aneuk muda nyang balap bak jalan watee teungoh malam. Nyan inti jih, kalinyoe lheuh keu haji Uma.
Haji Uma atawa Sudirman memang keubiet kalheuh geu ek haji. Teuman kon nyan nyang keuneuk Apa peugah sinoe. untuk geu duek bak kursi Senator atawa DPD RI dari Aceh, Haji Uma kalinyoe meuteume duek sigo treuk.
Sampe inoehat uroe suara Haji Uma, karap siploh kali lipat suara awak laen nyang na bak ururtan lumboi dua, lhee dan peut. Baroe Apa baca bak Koran Serambi Indonesia, ka lhee reutoh ribee leubeh, sang uroe nyoe ka peut reutoh atawa limong reutoh ribee leubeh, bak sang.
Seubab lagee yang ka ta teupu saban-saban. DPD nyan 4 droe sagai jatah. Lam periode nyang ka jalan nyoe, seulaen Haji Uma, na Fakhrurazi MIP, Ghazali Abbas dan Rafly Kande.
Untuk periode troh ukeu nyoe Haji Uma hana pat koh lom. Lumboi 2 paleng le lheuh haji Uma na Teungku Fadhil Rahmi, Ketua IKAT, nyang seureng ba-ba Useutad Abdussomad, sit rakan that ju dua geuh. beliau nyan na meu tujoh ploh ribee leubeh sampe baroe supot.
Lumboi lhee paleng le na Abdullah Puteh. Mantan Gubernur Aceh. Hana teujalok teuh neukiraju. Hana soe pike Teungku Lah Puteh ek meusaeng keu kursi DPD, bak sang sit tok gara-gara suara awak laen abeh geureupah le Haji Uma, seudangkan suara Pak Lah Puteh hana soe ganggu gugat. Seubab Tgk Lah Puteh, na basis droe nyang hana ji tupat le awak nyoe. Aleh ek nyoe meunan pih hom, meuka Apa reuboh ju, kadang ji tem lumpok. That na teuh kiraju. Limong ploh ribee leubeh geuteume le Tgk Lah suara. Sang keuneuk meutamah lom.
Teuman di senator Aceh nyang teungoh menjabat laen, nyakni Fakhrurazi, M.IP meuteume duk bak posisi lumboi 4 sit nyoe ilee, bacut kureung bak Tgk Lah Puteh suara sajan geuh, seukitaran peut ploh lapan ribee suara.
Nyan di miyup nyan hana ta peugah le. Nyan catatan sampe baroe supot. O uroe nyoe kadang soe nyang ka ji koh can bak tikungan hana ta tu'oh peugah sit. Neukiraju lagee Moto GP ju. Tgk Lah, lagee Rossi, adak ka tuha, mantong meuhie meuteume ek podium sang. Seudangkan haji Uma lagee Mak Makhes, hai Mark Marquez, kon meunan jikheun le awak Inggreh, Mak Mahes, meusen jue lheuh, meuasap lheuh watee ka geuteume tarek gaih, overlap lawan kiraju. That na teuh. Nasaja Apa peugah.
0 Response to "Lagee Mak Makhes, Teuga That Geubalap, Haji Uma Ka Pasti Ek Podium"
Post a Comment