Aneuk Miet Beut Dayah Waled Nu Meuteume Sertifikat Bahasa Tingkat Internasional Dari Jerman
Nasaja Berita - Samalanga, Dayah Waled Nu di Samalanga memang maken ji thee laju-laju. Seubab lam dayah seulaen beut kitab nyang that geu utamakan, na beut laen sit nyang sabee neuyu beut le Waled. Hai beut lam makna meureunoe.
Meunyoe baroesa na Apa peu ek bhaih beut komputer, sampe jeut ji keumeutik deungon mata teupet. Kalinyoe na beut bahsa Arab moderen lom. Pakek aplikasi dari Jerman.
Nyan neukalon, bahasa di Arab, aplikasi di Jerman. Ubee nyang ka Apa teupu, tok bak Dayah Waled Nu sagai saboh nyang na pakek aplikasi meureunoe bahasa Arab nyang dari Universitas Leipzig, Jerman nyan.
Malam Seualasa beuklam na 30 droe santri nyang neujok sertifikat le Waled langsong. Sertifikat Internasional. Apa ka dumno umu, meu sertifikat nasional tan meusaboh. Aneuk beut bak Dayah Waled ka Internasional saree sertifikat. Leupah bereh biet.
Nyoe sertifikat tingkai A1, nyang kalheuh meureunoe seulama 3 buleun. Dan watee geu tes lam aplikasi nyan, tes jih TOAFL, meunyoe basa Inggreh TOEFL nan jih, aleh kiban hom. Apa hana meuphom sit kiban hie tes nyan.
Neupeugah le Waled, "Bak tahap nyoe aneuk dayah ka lancar ji keumeutik lam bahsa Arab, ka teubiasa ji deungo ureung Arab meututo, dan teks Arab moderen pih ka seureng jibaca. Seubab aplikasi nyoe langsong konek bak internet. Watee ta tes, aeuk miet geutanyoe meureumpok nilai TOAFL di ateuh 80 persen."
Meunurot geusampaikan le Tgk. Abdul Hamdi M Djamil, seulaku koordinator program nyan na nam boh level lam belajar. A1 dan A2 untuk pemula, B1 dan B2 untuk maju dan C1 dan C2 untuk penguasaan nyang hayeu.
"Tiep-tiep level nyan na sampe 24 boh draih, atawa pelajaran." Kheun Teungku Abdul Hamid seulaku koordinator nyang meuphom bhaih nyan.
Meunan Apa baca bak web ummul ayman sang Teungku Muhammad Yusuf nyang tuleh bak web nyan seubab kode nan MY. Nasaja kiraju.
0 Response to "Aneuk Miet Beut Dayah Waled Nu Meuteume Sertifikat Bahasa Tingkat Internasional Dari Jerman"
Post a Comment