Ka Lom, 50 Kilo Sabu-Sabu di Lhokseumawe, 4 Droe Ureung Ji Beureukah Le Teuntra
Nasaja Berita – Lhokseumawe, Han abeh-abeh bha sabu-sabu lagoe di Aceh, golom si minggu baroe ban lheuh ta tuleh ji drop sabu-sabu dari Aceh Timu keuneuk ba u Panton Labu, nyoe ka jiramah lom ureung meulaot di Ujong Blang Lhokseumawe. That anco ka nanggroe.
Aleh wab ji baca berita Apa Raban baroesa, hana le ji publo lam nanggroe droe, ka ji keuneuk hu blah deh laot. That geu p'uep daih kiraju.
Sinoe neuklik berita 28 Kilo Sabu-sabu ji keuneuk ba u Panton Labu.
Meunurot geupeugah le Pak teuntra Komandan Lantamal 1 Laksamana Pertama TNI Ali Triswanto, S.E., M.Si di keu wartawan watee konferensi pers bak Mako Lanal Lhokseumawe, Lasa baroe (19/3) "Nyan peut droe nyang ta drop nyan sindikat Internasional Thailand – Aceh. MU, 27 thon, IR, 28 thon, HA, 27 thon dan IB, 36 thon." That muda-muda mantong lagoe.
"Awak nyan ta beureukah sideh di teungoh laot, seukitaran tujoh ploh Mil. Seulaen limong boh eumpang sabu-sabu, kira-kira 50 kilogram, pistol jenis Pietro Beretta si krek, magazen, tujoh neuk aneuk beude amunisi, lhee boh hape atawa handphone (merek Samsung dua boh dan Evercross saboh), GPS saboh merek garmin. Dua boh leumeng ubat (oskadon) mandum ta amankan." Kheuh Pak Triswanto nyan.
That geu soh min dih, nyan ka Apa pateh jaringan internasional. Hape samsung ji pakek, di Apa meumada ngon hape siokmi kiraju. Nyan pih ka crah layeu, likot ka phak lheuh ka. Teuman bek ilee, keupu Oskadon di awak nyan, pu saket igoe jih lam laot, atawa sit mabok laot? Adak meudeh meunyoe mabok laot, kon jeut, ji muek ju si on sapoe sabu-sabu nyan, mangat jeut keu ubat. Nasaja kiraju.
Meunurot Pak Triswanto nyan, Lhokseumawe jinoe kajeut keu pasai narkoba, lam wilayah Lhokseumawe ji meukat barang nyan, tulak tarek ngon toke sampe toke luwa nanggroe dari Thailand.
"Nyan awak nyan eunteuk keunong tuntutan pasal berlapir" Geupeugah le Pak Tris nyan. Teuman aleh padum lapeh hom sit, kadang sit keubiet meulapeh-lapeh lagee kueh lapeh, bisa jadi. Nasaja kiraju. Meubuet keuh laju ngon sabu-sabu peunyaket nyan, lam donya ji sak lampenjara, uroe dudo geugureng teuh lam nuraka.
Berta Apa rawi dari MediaAceh.co ata geutuleh le bang Zulkifli Anwar. Neupeuidin bang beh. Han troh Apa jak bak konferensi baroe, hana minyeuk moto.
0 Response to "Ka Lom, 50 Kilo Sabu-Sabu di Lhokseumawe, 4 Droe Ureung Ji Beureukah Le Teuntra"
Post a Comment