Uroe Nyoe Tes Santri Baro Bak Dayah Darul Ulum, Pengumuman Pajan?
Nasaja Berita – Banda Aceh, Baroesa kön na Apa Raban peu ek berita bhah ji buka pendaftaran Dayah Moderen Darul Ulum di Jambo Tape Banda Aceh. Rupajih uroe nyoe, uroe Aleuhad ka ji mulai tes untuk tamöng. Ji tes pu keuh ek jeut tamöng Dayah, seip nilai atawa suah meurnoe bak dasar lom. Nyan ban.
Seubab nyang nan jih tamöng sikula teutap na seleksi, ka meunan aturan. Han keumah meunyoe tamöng ju soe nyang galak beurangkasoe keunan. Payah ta sareng ile. Ka lagee ji sareng kupi, bek roh keudö-keudö keunan. Hek that useutad. Nasaja kiraju.
Geupeugah le panitia pelaksanaan tes Tgk. Rahmatul Fahmi, calon santri ramee nyang dari luwa Banda Aceh. Na nyang dari Aceh Barat, Aceh Selatan, Aceh Tengah di Gayo, sampe Aceh Timu pih na.
“Alhamdulillah thon nyoe tateurimong sekitar 320 droe santri baro. Hanjeut tateurimong leubeh, seubab kapasitas asrama tanyoe sekitar 950 droe sagai, leubeh bak nyan ka payah eh lam seumijid. Mudah-mudahan tiep daerah na perwakilan nyang luloh. Seubab biasa jih aneuk santri bak Darul Ulum nyoe dari Aceh panee mantöng na.” Kheun Teungku Useutad Rahmat.
Meunurot haba usteutad panitia nyan dari hasee ujoe baca Quran ramee calon santri nyang perlee peupah tahsin Al Quran teuma. Tahsin nyan peupah baca Quran beuroh makhrej, bek sampe huruh zo teubai ji baca huruf zai lipeh. Seubab meunyangkot kualitas generasi Aceh ukeu teuma singöh. Bek sampe meu Quran han lumpok ji baca.
“Nyoe beujeut keu renungan tanyoe bersama, soe teupeu ukeu aneuk tanyoe jeut keu calon presiden han sampoe suah meusom watee na ureung pakat tes beut. Dan han yö keu gob Quran. Jadi beuna gaseh sayang lah dari ureueng chik keu aneuk, beu tapekoe beuget bak ileumee agama. Nyan wajeb.” Sambong Teungku Useutad Rahmat.
Ujian Seleksi Penerimaan Santri Baru atawa nyang geusingkat Sipensaru Darul Ulum nyoe nakeuh untuk geusareng calon santri nyang cocok lagee standar belajar bak Dayah Modern Darul Ulum. Calon santri beu ek ji pike sit keu pelajaran sikula dan beut kitab kuneng ata geutanyoe Ahlussunnah wal Jama’ah. Di Darul Ulum, watee beungöh santri meureunoe pelajaran sikula, pelajaran umum, supot ek beut sampoe watee malam. Lam lokal sit, seubab kön ek beut bak balee lagee dayah Salafi lagee Mudi Mesra.
“Tanyoe cuma tabuka pendaftaran sigö lam sithon. Untuk thon nyoe ka tatop uroe Jeumeu'at (8/2) baroesa. Uroe nyoe tanggai (10/2) ka mulai ta tes sidroe-droe. Pengumuman luloh atawa hana keudeh bak uroe Rabu tanggai (13/2) enteuk bak web dayah www.darululumaceh.net jeut neukalön keudroe.” Kheun Teungku Useutad Rahmat nyan.
Tapi walau pih ka geutop, mantong na nyang tanyong peukeuh mantong na pendaftaran geulumbang kedua. Teungku Rahmat geujaweub singkat, “Hana lee. Cuma saboh geulumbang nyoe sagai.” Bak Apa kira sang teulat info di beliau nyan. Hana geubaca berita bak www.nasajaberita.com , kakeuh salah droe geuh. Nasaja kiraju.
0 Response to "Uroe Nyoe Tes Santri Baro Bak Dayah Darul Ulum, Pengumuman Pajan?"
Post a Comment