Di Jambi, Sandiaga: Kiban Na Mangat Mita Keurija Lawet Nyoe?
Nasaja Berita – Jambi, Calon Waki Presiden lumboi 2 nyang meupasang ngön Prabowo, Sandiaga Uno atawa nyang biasa geu meuhöi le ureung nyoe Bang Sandi, baroe uroe Jeumeu'at tanggai 25/1 geujak kampanye keudeh u Jambi. Jambi beh, kön Bambi. Meunyoe Bambi toe-toe Sigli. Bek eunteuk ka neu peugah Apa Raban peu ek berita hoax, padahai ureung droeneuh salah baca. Nyang pokokjih salah awak baca, kön salah Apa nyang tuleh, that na teuh.
Bang Sandi kampanye bak lapangan Tri Lomba Juang, Sungai Asam, Kota Jambi. Meunan ji tuleh bak detik.news.com. Nyang bek neu tanyöng bak Apa pat lapangan Tri Lomba Juang nyan. Apa hana leupah sahoe, paleng jioh 'oh Medan sagai, nyan pih jak intat dara baro, adek Da Mulah awai.
"Kiban awak droeneuh sinoe, pu na hawa barang-barang beu murah? Hai ukuran beu ek ta bloe?" Nyan ban geutanyöng le Bang Sandi lam kawan rame. "Hawa lah bang" nyan ban bak geujaweub le ureung ramee. Nyang pasti ile kön lam bahsa Aceh geupeugah haba, seubab di Jambi, kön di Bambi. Bek troh bak ayat nyan suah ta surah. Phak teuh neukiraju.
Lheuh nyan Bang Sandi geuceuköt bhah mita keurija bak awak RBT onlen, atawa ojek online meunyoe kheum awak Indoneh nyang ka meuinggreh siangen, bah pih han jeut mariet bahsa Inggreh. "Kiban pu na mangat mita keurija lawet nyoe, mangat pu payah?" That kompak bak di jaweub dum. "Payah bang." Lheuh nyan geusambong lom pertanyaan bang Sandi, "Na brat payah, atawa 'oe keubiet payah that-that?" Langsong ju ji sambong jawaban le ureung ramee " 'O keubie that payah hai bang." Nyan ban neukiraju.
"InsyaAllah eunteuk meunyoe meunang kamoe (Prabowo-Sandi) lumboi dua (2), ta mita keurija keu uteung droeneuh mandum. Inöng agam pokokjih, neu meudo'a beu meunang." Kheun Bang Sandi. Lheuh nyan geujak u pasai Angso Duo, toe-toe sinan sit.
Kalinyoe Sandi memang keuneuk fokus bhah ekonomi, terutama that usaha ubiet-ubiet keu ureung nyang han sep modal. Hai bang Sandi seulaku mantan Ketua HIPMI (Himpunan Pengusaha Muda Indonesia) sit ka cocok ju meunyoe nyan bhah geukampanye. Nyan timses, keurija ju. Bek sampe ji koh can le timses lawan. Ka hana pat cok ekonomi (s'en/rupiah) eunteuk. Nasaja neukiraju.
0 Response to "Di Jambi, Sandiaga: Kiban Na Mangat Mita Keurija Lawet Nyoe?"
Post a Comment