Meutuwah Meubahgia! IFI Aceh Jak Intat Bantuan keu Korban Banjir
Nasaja Berita – Banda Aceh, Lam padum uroe u likôt leupah brat ju ji ék ie atawa banjir meunyo jikhrun lam bahsa Indoneh, di kawasan Aceh Timu ngön Aceh Utara. Sayang ta kalön ureung gampông suah jak meungungsi u meulasah atawa u rumoh syèdara hoe laén.
Lam masa lagèe nyan, le syèdara-syèdara sabé Aceh teuh nyang jak bantu pu-pu nyang mungkén. Nyang jak bantu pih dari macam-macam seuragam dum. Mulai dari teungku, awak peungurôih partai, anggota dewan, sampé bak ibuk Gubernur na jak u lapangan. Teuma masa nyan h'ana Apa peu ék berita bak Nasaja.
Nyoe uroe nyoe Apa cuba peuphôn berita ureung jak bantu korban banjir nyan. Awak IFI atawa Ikatan Fisioterapi Indonesia di Aceh nyoe geukirém berita keu Apa Raban nyang bahwa ureung nyan ka geujak intat bantuan atra geupeusapat bacut sapoe untuk ureung nyang teungöh sôsah lam banjir ie raya baroesa nyan.
Nyang geujak intat h'ana le that. Tapi nyang keuh nyan kemampuan nyang ka ék geupeusapat. Na breuh meupadum boh sak, indomie meupadum boh kotak, boh manok dan minyeuk malinda. Laén nibak nyan, kadang na sit. Teuma h'ana geupeugah bak Apa.
Bantuan geujak intat langsông lé tim, nyang geupimpin lé Ketua IFI Aceh, Miswar dan Waki geuh, Mursal, lam program bakti sosial nyang geumat keumudo lé Lia Urrahmat.
Di Aceh Utara u gampông Mamprèe, Syamtalira Arôn geupeujôk bak geuchiek Erisal Bahri. Meunyo di Aceh Timu, bak gampông Aceh, Idi Rayek geupeujaroe bantuan nyan.
Jumlah bantuan nyang geupeusapat dari rakan dan syèdara h'ana kureung bak 20 juta. Leubèh na.
Seulaén geujak intat bantuan, na sit geubuka praktek siat sinan. Untuk konsultasi fisioterapi gratih keu ureung lam gampông nyan. Meutuwah that. Apa meubaca nyan bak Kontributor.top, berita uroe Sabtu baroe. Meutuwah dan meubahgia mandum aneuk kumuen Apa Raban.
0 Response to "Meutuwah Meubahgia! IFI Aceh Jak Intat Bantuan keu Korban Banjir"
Post a Comment