Rayek That Leubeh Uroe Asyura Lam Agama Tanyoe

 

Nasaja Berita - Agama, Jameun na sidroe ureung agam gasien, tinggai ngen sambinoe dan na aneuk geuh. Jadi bak saboh uroe, uroe nyan uroe Asyura, ureung nyan mansaboh rumoh geupuasa. Keutumon buka puasa manteng hana mupat (uroe Asyura nakeuh uroe keusiploh buleun Muharram, buleun Asan Usen kheun geutanyoe ureung Aceh)

Beungoh uroe le ureung agam gasien nyan geujak u peukan, jak mita raseuki, jak tueng upah peu nyang mungken. Tapi troh ngen asa uroe manteng hana meupeu sapeu. Akhe buet geutamong lah bak saboh keude meuh, ureung mukat jih ureung iseulam syit, bak geukalen hi pih meuteungku haji meunan.

Troh keunan, lheuh geubi saleum, maka geulakee lah meuh (peng) sidirham. Rupa jih po keude kriet 'alaihissalam. Hanjan le geu-use ureung gasien nyan, hai ukuran sira geutubiet meuleng-leng ie mata neukira ju. Jeh ho bak ujong raueh geujak klik, kateuduek tahe gante inan intang tiyang leseutrek. Weuh hate geuh bak geupike kiban cara geuwoe urumoh hana peu geutijik, umpang kanipho bak jaroe manteng soh. Di matauroe karap ilop, paki bah, ngen peu ibuka puasa aneuk peurumoh geuh siat teuk?

Rupa jih isampeng keude meuh bunoe na yahudi sidroe, jih tukang meuh syit. Dan na ikalen watee geu-use lam keude bunoe. Aleh kiban pih si yahudi sra'e nyan leumoh hate jih, ijak lah bak ureung gasien bunoe. Jak "samperin" ikheun le aneuk manyak ceuret lawet nyoe.. Trok keunan itanyong; "ho neuh teungku polem, peuna hai ilee ngen teungku haji rap bineh keude long?"

"oo hana saken, hai long meugade meuh bunoe sidirham, mangat na ngen peu long bloe tumon buka puasa keu ureung irumoh, man geupeugah geuyue kireuh lagee gobnyan kireuh. Hai na long kheun lom bunoe, teukeudi geutem bri, long meudoa keu gobnyan nibak uroe nyang that beurkat nyoe, tapi hana syit geupakoe, geuyue jak ho ret laju", suot ureung gasien nyan.

Le si yahudi nyan hireun jih, itanyong lom; "jadi peu uroe teuma uroe nyoe, sampe neupeugah meunan?"

"hai nyoe ken uroe Asyura! uroe teuleubeh lam agama,, begana begini keutek meugeutok", geupeutrang kelebihan uroe Asyura bak si yahudi.

Meunan lheuh abeh ideunge, ikheun le yahudi nyan; "meunye meunan neupeugah, geulantoe long peumulia uroe Asyura, nyopat bak long siploh dirham neucok, neujak mita laju bacut sapeu, uroe pih kasupot"

Nyan ban si yahudi meutuah nyan. 

Peu haba teuma di teungku gasien nyan ilee, ken lam supot geugrob cihui. Bunoe geupike syit kajadeh buka puasa ngen ie babah puteh. Karap geuneuk bhet tiang leseutrek geugulam urumoh geuneuk ruboh. Kakeuh lheuh geukheun teurimong gaseh geulakee idin lam kutika. Lam hate geuh "alhamdulillah, kajadeh lambong-lambong kupiah kali nyoe."

Jadi watee malam jih le teungku haji jeh bunoe geumeulumpoe. Kiban lumpoe geuh? Sang-sang donya ka kiamat, ureung kabeh deuk ngen grah dum, kaapoh-apah kaharo-hara. Jadi meuleumah teuk saboh istana ubee raya,, teupeuget dari permata puteh. Lheuh nyan lom pinto-pinto jih nibak yakut mirah, cukop lagak ju pokok jih (nyan yakut hana that long teu'oh ilong, hantom meukalen, jadi bek neutanyong kiban, neukalen ju bak-bak gugel, pokok jih yang jeulaih ken merek ie)

Kakeuh meunan lheuh geupeurap, geudeng samateungeh abah ret, geukheun le teungku haji nyan; "hai ureung po teumpat nyoe, neubri ie keulong bacut, long grah that-that kaa?"

Ken ka? Jadi bak geupreh-preh ureung suot, meudeuh teuk su; "hai pulan ben pulen, hai teungku haji kriet, nyoe istana nyoe na katupo? Atra droe keuh jatah jih. Tapi bak gara-gara han tatem peureumeun ureung gasien yang jak bak keude keuh bunoe uroe, sehingga anco hate jih, maka istana nyoe ka ken le keugata. Po nyang jinoe nakeuh si yahudi yang saboh binteh keude ngen droe keuh. Na tatuken? Jih siploh dirham ijok seudeukah keu ureung gasien nyan."

Meunan lheuh abeh su nyan.. Preuukk!! Teukeujot lah teungku haji, kajaga geuh teuduek lagee teusungket sinan lam peuratah, meulah-lah geuh ubee raya..

Beungoh nyan,, golom meuget itubiet matauroe, hanjan le geujak thok-thok pinto keude si yahudi. Lheuh ibuka pinto, kheun lah teungku haji nyan bak si yahudi; "lagee nyoe hai syara, geutanyoe ken jiran dua teuh? Seulaku jiran teuntee na hak saleng teumeulong saleng padoli, ken nye meunan? Jadi long na hajat bacut bak droe keuh. Ken na siploh dirham nyang tajok keu ureung geumade baroe? Neubi long bloe keudeh siploh dirham nyan, long jok peng keudroe keuh sireubee dirham?"

Si yahudi nyan ka ituho meukeusud teungku haji, geuneuk lakee bloe beunalah seudeukah uroe Asyura; "hai teungku haji, bek an sireubee dirham nah, adak sireutoh reubee dirham pih han kupubloe, ilong hana bangai kuh trok keunan. Jangankan kupubloe nah, sangkira neulakee tamong siat manteng neujak sangak-sangak lam istana long nyan, teutap han kubi. Palak kuh, brok that akai droe neuh, sampe hate neutem use ureung geumade nyan baroe, padahai hareuta pakmak tuhan peusinggah", kheun yahudi. Lagee teuseukak ngen guda teungku haji neukira ju..

Jadi le teungku haji hireun geuh, paki iteupeu si yahudi nyan; "pat kateupeu idroe keuh istana nyan, soe peugah?"

"Allah yang peuteupeu bak long, tuhan yang maha kaya maha kuasa, han geusia-siakan buet jroh geutanyoe hamba", nyan ban isuot le si yahudi (rupa jih si yahudi nyan na imeulumpoe syit)

Peu haba teuma di teungku haji? Teuhah abah geuh kalagee plok kanji.. Lam detik nyan laju si yahudi diucap dua kalimat syahadat.

أشهد أن لا إله إلا الله وحده لا شريك له وأشهد أن محمدا عبده ورسوله

Nyan ban hai syara meutuah. Nyan dum hebat beunalah neubri le Allah keu soe manteng nyang tem meuseudeukah bak uroe Asyura... Dum sidroe yahudi, neubri beunalah le Allah istana meugah, dan nyang that meuyum nakeuh karonya neubalek hate nibak kaphe hingga itamong iseulam. Peu lom tanyoe nyang ka tameuiman, neukira keudroe juuu.

Kiban inan? Uroe nyoe Asyura beh. Bek tuwe meuseudeukah, terutama that ilee keu aneuk peurumoh droe bagi nyang meurasa droe kajeut keu samlakoe. Wa amma nyang manteng sidroe, kakeuh kiban nyang mungken juuu.

Tulesan nyoe hana meukeusud SARA meubacut pih, teukeudi na kesamaan nama tokoh dan tempat, maka nyan neukira ju keu mangat ceurita. Semoga na manfaat. Saleum keu mandum rakan dari long aneuk muda sikureung lapan!

Teungku Yusuf Aree, Guree di Dayah Ummul Ayman (Mahasuwa Pascasarjana Ilmu Komunikasi IAIN Lhokseumawe)

Share this post