Meutuwah That! Ikatan Fisioterapi Intat Bantuan keu Korban Banjir Paya Tumpi
Nasaja Berita - Banda Aceh, Nyan neukalon, mungken ka le nyang hana teuingat le keu korban banjir bandang nyang na di Aceh Tengah, lheuh ujeun raya lam pertengahan buleun puasa baroe. Memang na sit nyang mantong teuingat, teuma kadang hana geupeugah-peugah le bak geutanyoe. Adak Apa pih lage-lage karap tuwo meunan. Alah ka teuingat lom lheuh jikirem info le Maidatul Akmal, keutua IFI Banda Aceh.
Rupajih le IFI (Ikatan Fisioterapi Indonesia) seulama nyoe na geubuka donasi untuk bantu pu-pu nyan mungken untuk korban banjir melalui gerakan nyang geu peunan Bantuan Fisioterapi Indonesia Peduli. Nyan keuh ureueng nyan nyang bantu. Kon cuma di Aceh, adak pat laen, asai mungken geubantu, teutap geubantu neukiraju.
Baroe bak uroe Sabtu tanggai 6 Juni 2020, ureueng nyan ka geujak intat bantuan lam bentuk bahan makanan atawa sembako seureuta seujumlah peng keu korban banjir.
Geupeugah le Maidatul Akmal, ureueng nyang brie bantuan meulalui ureueng IFI nyan, kon cuma ureueng Aceh. Tapi na dari seuluruh nanggroe Indonesia. Na nyang dari cabang di Tangerang, Padang, Jakarta dan laen-laen lom sideh dari blahdeh laot. Adak dari ketua PP-IFI sideh di pusat, waki keutua dan laen-laen lom na sit. Hai ukuran nah, han mungken tajak peugah sidroe-droe. Ka punoh berita ngon nan ureueng eunteuk, pane paih.
Nyang pokokjih rap mansaboh Indonesia nyoe na ikot bantu, hai ube mampu, keupada ureueng geutanyoe Aceh, lam hai nyoe nakeuh korban banjir di gampong Paya Tumpi, Aceh Tengah. Teuma kon alhamdulillah that.
Donasi ka geubuka lam padum uroe, meunurot geupeugah le beliau nyan. Bak Apa kira-kira seulama uroe raya bak sang. Atawa sit dari lam buleun puasa ka urueng sumbang. Pu lom meunyo ta ingat keu raya that pahala ta meuseudeukah bak buleun puasa. Teuma di geutanyoe sinoe lagee haba nyan sit. Na sit nyang bantu syedara nyang teungoh lam sosah, sidroe dua, na sit nyang meuteuga-teuga upat keu gob. Pu keuh lam puasa atawa lam masa uroe raya. Nyang upat hanjeut kureung neukiraju. Ka meunan adat. Adak Apa meunan sit kadang, sigo-go keunong le cut'iet bak Da Mulah. Sit ka meunan bumbu-bumbu cinta geutanyoe lam meukeluarga nah.
Boh ka, pubuet keunan. Seulaen daripada nyan, geupeugah lom le Maidatul Akmal bak Apa via inbox bak peseubok, na geuteume peusapat peng bantuan keu korban bajir di gampong Paya Tumpi nyan, hana kureung bak 24 juta rupiah. Leubeh na.
Jadi ureueng nyoe memang geujak intat keudroe dari Banda Aceh. Geukeurija sama deungon IFI cabang nyang na di Aceh Tengah, Takengon sideh. Nyan keuh baroe uroe Sabtu baro geuteume jak intat. Hai mungken lagee haba nyan, geupreh ilee siat dang le geupeusapat, dang geubeulanja atawa dang pu laen lom.
Meunyo na nyang tanyong, pu atra teuman Fisioterapi nyan, sampe awak nyan na ikatan. Nyang jeut Apa peugah nyan awak nyan rap saban lagee doto sit, na IDI. Teuma awak nyan ji terapi ureueng. Hai meuseu ureueng lumpuh atawa pu kadang. Nyang keuh keunan bak awak nyan tajak, supaya jibantu geutanyoe ngon ilme awak nyan untuk jeut ta latihan meujak-jak lom. Adak ureung patah-pate na sit. Hai nyan ube Apa teupu beh. Meunyo kon meunan, kakeuh bah geupeugah le droe geuh eunteuk jan nyang geu peugah. That paloe teuh!
Maidatul Akmal seulaku nyang peusampoe info nyoe bak Apa geusampaikan terimakasih that-that keu mandum, soe-soe mantong nyang ka ikot bantu syedara geutanyoe nyan. Pu keuh nyang bantu pikeran, teunaga seureuta peng dan laen-laen. Termasok geuterimakasih keu Apa seubab meutem peu ek berita keu bhaih nyoe.
Geupeugah bak Apa, "Nyan droeneuh Apa bek gadoh ngon bhaih leumo, sigo-go suah neuceukot dan peuingat sit, le that ureueng susah di Aceh, pu keuh nyang jeut keu korban banjir atawa pu laen nyang haruih saban-saban geutanyoe kalon dan geutanyoe bantu. Hai ube mampu Apa." Kheun beliau nyan. Teuman kon ka nyo haba beliau nyan, meusikhan naphaih hanjeut ta bantah.
Memang meutuwah that aneuk muda nyan. Sangkira na adoe Da Mulah nyang dara, sang jeut ta peukawen ngon beliau nyan. Teuman aleh kalheuh geumeukawen di beliau nyan pih hom. Di Apa pih lam masa lheuh uroe raya nyoe, bagian jak cak rauh saja, makajih le gabuk keu pu laen. Hai lagee haba itu, nyan kon bagian dari bantu ureueng meukarat sit. Meukarat kawen. Nasaja kiraju.
0 Response to "Meutuwah That! Ikatan Fisioterapi Intat Bantuan keu Korban Banjir Paya Tumpi"
Post a Comment