Meutheun Langkah Lam Masa Covid 19, SAPEFAM Mulai Jak Intat Bantuan Keulayi
Nasaja Berita - Lhokseumawe, Nyan ban di ureueng nyoe untuk peujak buet ata nyang ka pakat jameun. Teutap geumat saban-saban komitmen. Nyoe ka jalan sithon leubeh keurija bantu syedara seusama Aceh nyang na lam beut dari keluarga ureueng fakir dan miskin.
Yayasan SAPEFAM (Santunan Pendidikan Fakir dan Miskin) nibak uroe Jeumeu'at tanggai 19 Juli 2020 baroe, ka geumulai jak intat bantuan lom berupa peng keu kebutuhan pendidikan dan jajan aneuk miet beut nyang na lam padum-padum boh dayah di Aceh.
Memang gohlom mandum aneuk ureueng gasien nyang ka ek geubantu, Dan golom bak mandum dayah. Hai meunurot nyan, seubab mandum nyan seusuai dengon dana dan kekuatan sajan ureueng Sapefam nyan.
Bunoe geujak intat bantuan peng pendidikan keu santri Dayah Darul Huda, Lueng Angen, Tgk. Syafi'i dan santri Dayah Malikussaleh, Pantonlabu, Tgk. Muhammad Muktadir.
Tgk. Syafi'i nyoe santri dari Sukarjo, Kota Langsa, seudangkan Tgk. Muktadir ureueng jak meununtut ilme agama di dayah dari gampong Meunasah Asan, Kecamatan Madat, Kabupaten Aceh Timur.
"Bantuan nyoe nakeuh lanjutan dari nyang ka ta janji keu ureueng beut. Seubab kondisi covid baroesa, maka meutheun ta intat bantuan. Termasuk ata buleun lhee, seubab ka gabek ngon corona, na dayah nyang peu pre dan han geuteurimong jamee. Makajih nyoe ta peusigo, ata buleun lhee baroesa, ngon ata buleun nam thon 2020, jadi tiep-tiep santri nyoe meureumpok peng sijuta rupiah sapoe." kheun Ketua Yayasan SAPEFAM, Tgk. Musliadi.
Dan geupeugah lom le Teungku Musliadi nyang bahwa, bunoe baro dua boh dayah geujak intat. Seudangkan na sisa keu padum droe teuk di dayah Abu Keutapang, dayah Cot Trueng dan dayah Serambi Aceh di Bireuen, nyan akan geujak intat mandum lam minggu nyoe.
Meunyoe na nyang tanyong buleun peut ngon bulen limong pakon hana meureumpok, nyan seubab lam buleun nyan hana beut. Pre buleun puasa ngon uroe raya. Makajih hana bantuan. Seubab nyoe bantuan pendidikan. Meunyo lam buleun pre, kakeuh hana bantuan. Ka meunan janji dan kontrak dari awai.
"Kamoe seulaku penguruih yayasan, meupeusampoe terimakasih beurayek that keu para donatur, nyang ka le geubantu aneuk beut seulama nyoe. Meunan sit keu pihak dayah-dayah di Aceh, nyang ka meuteurimong kamoe dan nebantu kamoe lam hai kegiatan amal seulama nyoe. Doa bak kamoe dan geutanyoe mandum, beu beureukat donya akhirat." kheun Tgk. Musliadi.
Dan akan geutamah lom penerima bantuan nyoe lam buleun tujoh eunteuk. "Keu penerima nyang baro, insya Allah akan ta intat lam buleun tujoh eunteuk. Nyoe kalheuh tajak verifikasi keu calon santri nyang akan teurimong bantuan." meunan geutop haba le Teungku Musliadi.
Jadi nyang peurle peutrang bak ureueng, ramee nyang bahwa SAPEFAM nyoe meubantu 500 ribee rupiah untuk tiep buleun keupada nyang teurimong bantuan. Dan nyan meutanggong sampoe glah tujoh lam dayah.
Keu mandum masyarakat dan kawom muslimin nyang kadang hawa keuneuk bantu, maka saban-saban ta bantu. Dan SAPEFAM nakeuh salah saboh yayasan, nyang fokuih lam bhaih brie bantuan peng keu anek miet beut nyang kureung mampu lam hai ekonomi.
Keu info sapefam, neumita ju bak facebook halaman Sapefam. Atawa neumita ju nan akun Musliadi Almira seulaku ketua. Bak gobnyan jeut neutanyong pu nyang peurle tanyong. Dan jeut neubantu pu nyang peurlee bantu. Meunyo lumboi rekening, ka jeulaih that leumah bak poto.
0 Response to "Meutheun Langkah Lam Masa Covid 19, SAPEFAM Mulai Jak Intat Bantuan Keulayi"
Post a Comment