Partai Aceh: Poemerintah Aceh, Seugolom Cok Kebijakan Ci Pike Beupah Ilee
Nasaja Berita - Banda Aceh | Dewan Pimpinan Aceh - Partai Aceh (DPA-PA) geupeusampo pernyataan sikeup masalah hai Virus Corona Atawa Covid-19 di bumo Aceh. Pernyataan sikeup geupeusampoe buet Ulee Keumudo Posko Relawan Covid-19 Partai Aceh, Tgk. H. Muharuddin, geuwakili Pimpinan Partai Aceh bak uroe Jum'at seupot uroe beunoe (3/4/2020), bak Kanto DPA-PA, Batoh, Kota Banda Aceh.
Teuma lam pernyataan sikeup yang geuteken buet Muallem atawa Muzakir Manaf ngon Sekretaris Jenderal PA Abu Radak atawa Kamaruddin Abubakar bak 31 Maret 2020 nyan, Tgk. Muharuddin geupeusampoe bahwa Partai Aceh geulake bak Poemeurintah Aceh seugolom peuget buet keu keundali pademi peunyaket Ta'eun atawa Covid-19 nyoe, adak jeut neupike-pike ilee ngon neumeuruno beu pah teuntang hai nyang i plueng bak masalah sosial masyarakat Aceh nyang jeut keu korban gara-gara Ta'eun nyoe.
"Nyoe koen pue laen, mangat bek hi that kebijakan-kebijakan nyang dipubuet lagee meu copy-paste atawa latah ta ikot-ikot daerah gop di Indonesia seuhingga ka hana cocok deungon kearifan lokal droe teuh nah," kheun Tgk. Muhar nyang jinoe geujabat keu Waki Sekertaris Jenderal DPA-PA chit.
Teuma laen nibak nyan geutamah lom lee Tgk. Muhar, Partai Aceh geulake chit bak Poemeurintah Aceh beu geubi informasi nyang beutoi ngon beupah keu masyarakat keu hai langkah ngon strategi Poemeurintah Aceh bak geu keundali ngon tapeugadoh peunyaket Ta'eun Covid-19 nyoe mangat di pateh lee masyarakat bahwa na geupeubuet nyang jroh lee Poemeurintah jinoe. Koen malah tayak peuget buet ngon informasi nyang peusaket ulee ngon peuyoe masyakarat dum bak geulawan peunyaket Ta'eun nyoe.
"Koen malah tayak peuget buet ngon informasi nyang peusaket ulee ngon peuyoe masyarakat. Bek sampe tayak peugah hai-hai nyang jeut keuyoe ureueng dum, lagee barosa tayak peugah kalheuh meu booking tanoh keu kuburan massal," geuteugah lee Tgk. Muhar.
Lheuh nyan, teukayet Jeum Malam i Aceh seulama dua buleuen ukeu, Tgk. Muhar geupeugah, Partai Aceh geudesak Poemeurintah Aceh beu geujamin na barang-barang nyang perlee keu si uroe-uroe keu masyarakat, ngon geutindak seucara teugah ret peuroses hukom keu soe marangkasoe yang i tumpok barang ngon beuhee that bak ji peu ek harga barang seucara hana wajar sagai.
"Poemeurintah Aceh beuna chit solusi nyang adee ngon meu untong keu awak meukat i Aceh nyang rugo akibat kebijakan Poemeurintah nyang yue top teumpat-teumpat usaha ureueng nyan seuhingga meudampak seurius bak lambat that i beudoh ekonomi Aceh ngon gadoh raseuki awak meukat biasa ngon awak meukat bak malam uroe, pue lom nyang meukat kacang reuboh," geupeujeulah lom buet mantan Ketua DPRA nyan.
"Poemeurintah Aceh pih adak jeut beu geutinjau ulang Jeum Malam beu kureueng bak dua buleuen adak jeut chit bek na haree, kecuali keu gampong-gampong nyang ka memang jeut keu teumpat i meuneu'en peunyaket nyan, hai maksudjih nyang na ureueng nyang ka positif Corona nyan, kareuna katateupue buet geutanyoe bersama hana trep lee katroek buleuen Puasa," geutamah lee Tgk. Muhar.
Keu Teuntra atawa Peulisi, kheun Tgk. Muhar, Partai Aceh geulake mangat wate pubuet pembinaan seucara positif keu masyarakat nyang meulanggar Jeum Malam nyan, nyang bek neulake trom atawa pue laen.
"Hai bek na nyang pubuet sampe geulake trom atawa pue laen, keu tahindari trauma baro bak masyarakat nah, bek sampe teu ingat teuh masa konflik jameun, kalheuh jameun adak jeut bek lee jinoe koen meunan," kheun Tgk. Muhar lom
Laen nibak nyan, Tgk. Muhar geutamah lom bahwa Partai Aceh geudesak chit Poemeurintah Aceh ngon DPRA keu beubagah memformulasi ngon peuget reuncana ulang APBA 2020, keu geu peurasionalisasikan keu program ngon kebijakan nyang hana that perle mangat geu alihkan anggaran nyan keu program ta peuseuleuso peunyaket Ta'eun Covid-19 nyoe, dan beuna solusi keu masyarakat nyang keunong peunyaket nyan seucara langsong ataupun seucara hana langsong.[]
0 Response to "Partai Aceh: Poemerintah Aceh, Seugolom Cok Kebijakan Ci Pike Beupah Ilee"
Post a Comment