Peusan Abi Muhib keue Masyarakat Aceh Teukaét Corona
Nasaja Berita - Banda Aceh, Deungön meutamah brat wabah virus corona nyang teungöh meulanda nanggroe geutanyoe Indonesia, peurlè that ta jaga droe. Bah pih di Aceh golom na kasus nyang positif. H'an teuntè h'an, bak saboh uroe akan trôh u nanggroe geutanyoe. Peusôh keudéh
Maka dari nyan Teungku Haji Muhibbussabri A Wahab atawa Abi Muhib geu brie himbauan keue masyarakat Aceh, supaya saban-saban ta indahkan seruan dari poemerintah Aceh untuk jaga droe dari wabah.
"Wabah corona nyan beutôi dan nyata. Bèk ta peuèlèh. Tapi geutanyoe bèk panik sit," kheun Abi Muhib.
Seubab meunyo panik, geutanyoe rhet keue teumakôt nyang h'ana meu'oh ban. Seuhingga jeut keue peunyakét, ka kön corona. Jeut keue sakét pu laén.
"Jih cara keurija virus nyan, jimita tubôh nyang leumöh. Maka peureulè that ta jaga droe, ta peuteuga sistem imunitas deungön gaya udép sihat." Lanjôt Abi Muhib.
Cara meuudép sihat nyang geupeugah lé Abi Muhib nakeuh lagèe tuntunan rasulullah. Pajôh makanan nyang sihat, bergizi, seureuta nyang haleu. Tubôh teuh beu gléh sabé. "Jaga ie seumbahyang, seulaén jeut keue gléh badan, jeut keue ibadah meunyo ta niet lillahi ta'ala." Nasihat Abi.
"Makanan nyang tanyoe konsumsi nyan jeut keue peulindông tubôh geutanyoe dari dalam. Makanan nyang sihat-sihat ta konsumsi." Himbau Abi Muhib.
Saban lagèe himbauan dari poemerintah Aceh, Abi Muhib geupeuingat sit, supaya geutanyoe bèk that ta meusapat droe deungön ureueng ramè.
"Peunyakét dari virus nyan tersebar lam kawan ramè. Tanyoe h'ana ta turie ureueng lam kawan rame. Kadang na nyang ban woe dari Medan. Atawa sit dari lua nanggroe. Soe teupu meunyo gobnyan na teupèh atawa teu ba virus nyan, tanpa geusadari." Meunan geupeugah lé Abi Muhib.
Deungön kondisi susah that ta teumè masker jinoe, Abi geuharap keue ureueng inöng, terutama that, jeut pakèk cadar gulantoe masker.
Leubèh dari nyan, Abi geuhimbau sit bak masyarakat Aceh untuk saban saré, sabé-sabé untuk ta meulakè bak Poe teuh Allah nyang sidroe supaya beu Allah peujiôh ubé na peunyakét dan bala lam nanggroe.
"Seumayang bèk lé tinggai. Lheuh seumayang tameudo'a bak Allah supaya beu neujaga geutanyoe dan keluarga dari seugala mara bahaya." Harap keutua umum Partai PDA.
Meunan sit, seruan dari Majeulis Permusyawaratan Ulama, lam jama'ah, ta baca do'a qunut nazilah bak raka'at seuneulheuh. Seubab do'a nakeuh saboh seunjata keue geutanyoe mukmin untuk talawan seugala mara bahaya.
"Ta kalön kondisi terkini, wabah corona nyoe ka trôk u Medan. Makén toe laju-laju ngön geutanyoe Aceh. Ta meulakè bak Allah beu neupeujiôh ubé na bala." Meunan geutôp haba lé Abi Muhib.
0 Response to "Peusan Abi Muhib keue Masyarakat Aceh Teukaét Corona"
Post a Comment