MPU Aceh Harap Jama'ah Teutap Seumayang di Seumijid, Baca Qunut Nazilah
Nasaja Berita - Banda Aceh, Beda ngon seruan MUI sideh di Jakarta nyang geuhimbau jeut peukureung seumayang jama'ah di seumijid. Seudangkan Mejelis Permusyawaratan Ulama atawa MPU Aceh geuharap supaya masyarakat Aceh teutap peurame seumijid seureuta meunasah. Lam seumayang jeut ta baca do'a Qunut Nazilah seureuta wirid laen, ta meulake bak Poe teuh Allah ta'ala supaya Neupeujioh ubee na bala dan peunyaket lam nanggroe.
"Tanyoe tapakat masyarakat untuk pubuet ibadah beujeumot. Bahkan beuleubeh dari biasa. Ta taubat saban-saban teuh, ta tawakal, ta seurah droe bak Allah ta'ala," Kheun Teungku haji Faisal Ali, atawa Abu Sibreh.
"Masyarakat beu saba ateuh musibah dan bala. Ta meud'a sabe-sabe beujioh dari peunyaket dan bala." Sambong Lem Faisal, seulaku wakil keutua MPU Aceh, nibak uroe Rabu tanggai 18 baroe.
Nyan haba nyan, neupeusampo le MPU seubagoe tausyiah ateuh keujadian nyang teungoh brat that di neugara Indoneh, nyakni wabah virus corona atawa Covid-19 lawet nyoe.
Lam surat tausyiah nyan neutandatangan le keutua MPU nyang baro jinoe, seureuta pimpinan MPU nyang laen. Mulai dari Tgk H M Daud Zamzamy atawa Abi Daud seulaku keutuwa, Wakil Keutua Tgk H Faisal Ali, Wakil Keutua Dr Tgk Muhibbuththabari M Ag dan Wakil Keutua Tgk H Hasbi Albayuni atawa nyang tanyoe turi deungon nan Abi Bayu.
Seulaen lam hai teutap seumayang jama'ah di seumijid atawa meunasah, MPU Aceh geupeusamo sit supaya gaya udep tanyoe beu gleh lagee kiban buet Nabi dan sahbat, nyakni beu tajaga wudhu, beu gleh teuh.
"Meunan sit keue makanan ngon minuman, beu halalan thayyiban. Pemerintah Aceh dan Pemerintah kabupaten/kota haruih ek jifasilitasi pelaksanaan sterilisasi di teumpat-teumpat ibadah dan fasilitas umum laen. Deungon tujuan jeut bek teupeh dari keunong peunyaket virus Corona atau Covid-19," kheun Lema Faisal.
Masyarakat bek panik dan beutenang, tapi teutap beu waspada. Bek sampe berlebihan that bak ta sikapi keue bhaih wabah nyoe. Dan nyang seuneulheuh teutap ta ikot kiban arahan dari poemerintah teuh.
"Keue para ureueng chiek, teutap beu tajaga aneuk lam lingkungan keuluarga dan masyarakat." Meunan geutop haba le Abu Sibreh.
Meunan Apa baca bak Antara nyang jituleh le dek Zubaidah, aneuk kumuen Apa nyang paleng lagak lam kawan.
0 Response to "MPU Aceh Harap Jama'ah Teutap Seumayang di Seumijid, Baca Qunut Nazilah"
Post a Comment