Komunitas Aneuk Muda Banda Aceh, Peuduek Safari Dakwah Habib Hayqal Alaydrus
Nasaja Berita - Banda Aceh, Komunitas Pemuda pecinta Ilmu Agama, Raisul Fata kalinyoe na jipeugot safari dakwah, lagee nyang tom jipeugot bak thon nyang ka leupah. Meuseu thon ka leupah nyang jiundang Habib Muhammad bin Anies dari Malang, kalinyoe Habib Hayqal Alaydrus, nyang meurupakan murid daripada Habib Umar bin Hafiz. Ulama nyang jithee le donya dari Tarim, Yaman.
Jadwal keugiatan akan jimulai phon dari seumijid Darul Makmur gampong Lambaroe Skep, mulai lheuh seumayang Mugreb, nibak uroe Jeumeu'at (20/12) malam Sabtu. Seudangkan seulingoh jih bak uroe Sabtu tanggai 21/12 acara jipeuduek nibak kampus Unsyiah, teupat jih bak aula fakultaih Ekonomi. tema nyang diangkat kalinyoe na keuh Daily Sunnah, nyakni sunnah-sunnah lam buet siuroe-uroe. Teuman meunyo habib nyang calitra sunnah sit meurie ju, leubeh meurasa meunan. Seubab biasa jih meunyo habib-habib nyan udep geuh lam sunnah sabe.
Nyang bak aula nyan acara jih beungoh poh 9 sampo seuleusoe. Leubeh kureung sampo rap watee Leuho uroe. Poh 12 leubeh kureung.
Supot uroe, lheuh Seumayang Asa, lanjot lom kajian bak cafe Le More, Lampineung, toe deungon hotel Hermes. Nyan kajian keu aneuk muda, tema jih pih meuaneuk muda meunan. "Dunia, Santuy jangan Nge-gas", teyuman kon brat meu aneuk muda dan meu milenial meunan kiraju. Ka cocok, seubab aneuk muda nyang peugot, gaya beu meuaneuk muda sit. Mangat rame nyang teutarek. Nyan bak acara nyan eunteuk Habib Hayqal akan geu duet deungon Doktor Amri Fatmi. Salah sidroe alumi Al Azhar jurusan Aqidah Filsafat. Jithee malem ureung.
Malam jih sambong lom keudeh bak seumijid Lamdingin, nyakni seumijid Al Abrar. Sinan bak seumijid nyan acara kajian mulai lheuh Isya.
Uroe Aleuhad tanggai 22/12 penutupan keudeh bak seumijid Baitul Allam, Kuta Alam, di likot kanto Bulog. Atawa meunyo tajak rot jalan kuta Alam, tamong jalan di sampeng Kulam Kupi awai, atawa dibineh gudang PMTOH.
Nyan acara nyoe kon cuma komunitas Raisul Fata nyang jeut keu panitia, tapi na sit komunitas laen, lagee Majelis Mahabbah Rasulullah, majelis Halaqatul Qulub dan laen-laen lom.
Nyan lagee nyan seunang teuh keudeh, meunyo rame aneuk muda nyang tem pakoe keu agama. Peugot komunitas beu le, jadi ka le majelis taklem di kota Banda Aceh. Terutama keu aneuk muda. Supaya aneuk muda nyoe bek laloe hana meupu tuwo jak beut.
Meunan rilih berita nyang jikirem le Azis Aneuk Pak Ajeuwardi keu Nasaja Berita, hana that Apa edit le diakritik jih.
0 Response to "Komunitas Aneuk Muda Banda Aceh, Peuduek Safari Dakwah Habib Hayqal Alaydrus"
Post a Comment