Jalan Paya Bakông Ka Lagè Kulam, Warga Theun Kawé Bak Jalan Raya
Nasaja Berita – Aceh Utara, Na padum-padum droe masyarakat kecamatan Paya Bakong uroe Aleuhad (15/12) baroe, ka ji keumawé bak jalan raya neukiraju. Alèh kiban cara nyang pokok jih ka jitheun kawé di teungöh jalan aseupal nyan. Alèh hana yöe geuh dum takôt jipeupök lé moto döng pih hom.
Nyang bèk neutanyöng pu keuh na rôh suw'iek, seungkö atawa bacé. Seubab nyan jeunéh eungköt paya. Meunyo neuharap keu seumilang, rambeu atawa surè, keudéh u laôt neujak theun kawé. Meuhan u pasai ju leubèh mudah lom jikap. Siôn ôn Soekarno ka meumada. Teuman meunyoe ôn Patimura lagèe haba nyan ju. Glah keu Parkir, han sép keu sira.
Beh ka, pu buet keunan roh. Kön nyang peurlè peugah, rôh meurawi.
Jadi seubagian masyarakat Paya Bakông nyan sit geuseungaja meunan geupeulaku. Seubab lheuh jitôh ureung, teudöng ie ateuh jalan peureuséh kulam eungköt. Ruhueng jalan ubé-ubé mön Buruhuet neukiraju. Bèk 'an jiblôh honda meu dum moto geureubak meunyo jiteumè rôh lam uruek nyan, meujeu'iet sue geureundang. Nyan dum parah ka jalan.
That na teuh, jalan kecamatan rap sadum kualitaih ngön jalan lam gampông masa lam masa konflik awai. Leubéh göt jalan lam gampông Apa na.
Nyan lam kulam aseupal nyan, kön cuma na ureung keumawé, bahkan na nyang ba gayông-gayông lom manoe ngön ie nyan. Teuman na buet teuh dum.
Rupajih, cek walakacek, nyan seubagoe cara geuprotèh keu poemerintah, pu keuh poemerintah pusat, diateih pusat atawa di miyub pusat, untuk brie perhatian keu kondisi jalan utama kecamatan Paya Bakông nyan.
T. M. Isa Aziz nyang wakili warga Paya Bakông geusampaikan nyang bahwa jalan Paya Bakông nyoe meunyo ta eu kondisi jinoe meunkr'et até, meudh'et-dh'et lam ulèe, hue aneuk mata teuh. Masyarakat Paya Bakông that brat geuharap beu na soe nyang rehab jalan nyan. Utama jih dari poemerintah.
Pu lom,.meunurôt T.M Isa Aziz nyan jalan Paya Bakông nakeuh jalan akses untuk jak u waduk Kretoe, salah saboh proyek Nasional. "Adak meujeut, jalan akses nyoe beu na perhatian dari poemerintah. Pu keuh poemerintah pusat, atawa nyang di miyub pusat (povinsi dan kabupaten)." Kheun T.M. Isa Aziz nyan.
0 Response to "Jalan Paya Bakông Ka Lagè Kulam, Warga Theun Kawé Bak Jalan Raya"
Post a Comment