Hikeumah Seumayang Wajeb Nyang Limong, Ngon Raka'at Nyang Tujong Blah

Nasaja Berita – Samalanga, Nyan ban neukalon, seubab beuklam ta peurayek peringatan Isra dan Mikraj daripada Nabi Muhammad SAW, jadi bah uroe nyoe ta tuleh bhaih agama teuh meu saboh dua. Jadi kalinyoe na geukirem tulesan keu Apa bunoe Suboh le salah sidroe Teungku Dayah dari Samalanga.

Seumayang wajeb nyang limong, lam kitab fikah seureng sit geupeunan seumayang maktubah atawa seumayang mafrudhah. Nyang areuti jih seumayang wajeb. Wajeb lam makna fikah, meunyoe ta pubuet meureumpok fahla nyang ubee raya. Seudangkan meunyoe ta tinggai, raya panyang desya, ukuran ju utak teuh geu tot lam apui nuraka. Meunan lah kureung leubeh makna dari wajeb atawa fardhu nyan lam fikah.

Jumlah raka'at pih han saban man limong boh jeuneh watee seumayang nyan. Suboh 2 raka'at, Leuho ngon Asa 4 raka'at, Magreb 3 raka'at, trok bak Isya ka 4 raka'at lom. Meunyoe ta jumlah lam siuroe simalam ji dong 17 boh raka'at. Bek na reuncana tamah atawa peukureung, hanjeut keu raka'at nyan. Hana sie tuwo beda calitra, na hukom laen nyakni sujud sahwi bak ujong seugolom saleum.

Teuman pu na tom roh neu teumanyong lam pikeran neuh atawa bak tteungku, pakon seumayang nyang geupeuwajeb tok limong, dan jumlah raka'at hanjeut kureung atawa leubeh nibak 17 raka'at sagai? Atawa sit hanjeut ta balek-balek jumlah raka'at tiep seumayang. Miseu jih ta seumayang Suboh 3 raka'at, Magreb 7 raka'at, Leuho 2 raka'at mantong, Asa 1 raka'at, bak Isya ta takat 4 raka'at?  Na tom neu pike meunan?

Jawaban jih simple that, adak bak Teungku beurangkari jeut neu tanyong, jawaban jih saboh sagai, Ta'bbudy. Kon ta 'ap bu lheu nyan ta jeip ie. Tapi Ta'abbudy, areuti jih, ikot lagee geuyu le Allah ta'ala, hana payah tanyong nyoe jeh, hana alasan. Ka lagee nyan geuyu, bek le that proteh. Meunan jawaban nyang geu surah le Teungku Syeikh Imam Al Qulyubi, nyang tuleh kitab Mahli, Hasyiyah Qulyubi.

Leubeh bak nyan jawaban hana. Meunyoe keubiet neu dawa dan neu proteh, tapak silop ngon sipatu keu ubat. That na teuh.

Teuman di balek nyan na hikmah geupeugah le Imum Qulyubi nyan. Nyakni meunyoe ta kali udep normal sidroe-droe ureung nyang meutuwah, dari 24 jeum, na 12 jeum lam si uroe geumeujaga. Tamah 3 jeum watee awai malam, dari Seugolom Magreb sampe Isya. Lheuh nyan beudoh beungoh seugolom Suboh, ukuran 2 jeum seugolom beungoh. Maka jumlah jih 17 jeum manusia nyoe meuduep lam si uroe si malam. Leubeh bak nyan cot boh idong u langet.

Maka lam 17 jeum jaga teuh nyan pasti na ta pubuet desya. 17 raka'at nyan akan geu hapoih le le Allah ta'ala akan desya geutanyoe hamba. Nyang pasti desya ubiet. Kon desya rayek atawa desya ngen manusia laen. Seubab desya rayek, cara beu neu peu ampon le Allah ta'ala deungon tobat nasuha. Seudangkan densya ngon makhluk suah jak lakee meu'ah dan lakee idien bak poe pihak.

Teuman kiban calitra meunyoe tinggai seumayang? Nyan lam kitab geukheun keu ureung nyan desya rayek. Geupeusanteut deungon binatang nyang hina "Ghairu Mutharam". Lam saboh surah geukheun, meunyoe ibarat lam laot raya kapai keuneuk karam, seubab ka punoh muatan, maka daripada ta beh raga nyang asoe jih makanan, atawa ie tawar geu geujep ureung lam kapai, leubeh get ta tiek ureung nyang hana seumayang nyan lam laot luwah. Nyan dum hina ureung hana seumayang. Hana yum sagai, bahkan leubeh meu yum brueh saboh sak atawa ie saboh galo daripada ureung hana seumayang nyan.

Teungku Yusuf Aree, S.Sos 
Guree bak Dayah Ummul Ayman, Samalanga

Share this post